IU diz que la sentencia del TSXA pon fin a un esperpentu políticu y xudicial

IU señaló que la sentencia sobre los fechos asocedíos nel 2007, cuando militantes d'IU y PCA enfrentáronse na sede de Plaza d'América, pon fin a un "esperpentu" políticu y xudicial.

Al traviés d'una nota de prensa, IU d'Asturies referíase asina a la sentencia de la Sala de lo Civil y lo Penal del Tribunal Superior de Xusticia d'Asturies que condenó a una falta de coacciones a cuatro dirixentes d'IU d'Asturies, incluyíos la conseyera de Bienestar Social y Vivienda, Noemí Martín, y el coordinador d'IU d'Asturies, Jesús Iglesias.

Pa la formación política, lo importante ye que resultaron "absueltos de los delitos" de coacciones y falsedá documental. L'acusación, "entamada por un grupu minoritariu", namás buscaba atacar y erosionar a esa formación política y al proyectu políticu que representa, indicaron.
  
"El TSXA confirma que nun hai delitu y reduz los fechos a una simple falta a la qu'otorga la menor pena posible", señalaron, pa dicir de  siguío que la sentencia ye "un nuevu varapalu" pa esi "reducíu grupu que cada vez ta más aisláu y quedó n'absoluta minoría nel últimu congresu del PCE defendiendo la disolución d'IU".