Convoquen una manifestación pol derechu a vivir en vascu en Navarra

Nafarroa Bai mostró la so incorporación a la manifestación en favor del vascu entamada por Kontseilua baxo'l lema 'Derechu a vivir en vascu en Navarra'.

Amás, animó a tolos ciudadanos a sumase a esta marcha "a favor de los derechos llingüísticos y la defensa del vascu". La parllamentaria de la coalición María Luisa Mangado criticó nun comunicáu que "el Gobiernu de Navarra y el conseyeru foral d'Educación, Alberto Catalán, tán utilizando la crisis como escusa, mientres gasten el dineru nos sos proyeutos faraónicos, p'aplicar drásticos recortes a la nuesa llingua".
  
Por ello, defendió qu'esta situación "requier d'una respuesta social conxunta y un ampliu movimientu ente tolos que creemos nel eusquera como llingua propia". Mangado consideró que la sociedá "tien de colar unida pa reivindicar al Gobiernu de la derecha, y al que lo caltién nel poder, el PSN, los derechos llingüísticos que mos correspuenden".
  
"Los qu'amamos la nuesa llingua queremos vivir al traviés d'ella, comunicamos con ella, poder utilizala nes alministraciones, y poder aprendela en tolos llugares de la Comunidá foral por igual", caltuvo. Al so xuiciu, "nun ye cuestión de presupuestos, sinón de voluntá". "UPN dexa claro día tres día'l so despreciu más absolutu al eusquera", censuró.
  
"Nun queremos más escuses, queremos que les alministraciones públiques cumplan colos sos compromisos y deberes, y respeten y defendan d'una vez el nuesu patrimoniu llingüísticu, históricu y identitariu", indicó.

Pela so parte, EA tamién animó a la ciudadanía a participar na marcha y destacó, nun comunicáu, la importancia de la "reivindicación social" pa que "el Gobiernu d'UPN, d'una vez por toes, dexe d'atacar de forma sistemática al vascu, y cumpla coles sos obligaciones en materia de política llingüística".
  
Amás, EA mostró'l so "refugu más atayante" a la llei del vascu, puesto que divide Navarra en tres zones llingüístiques diferentes, "rebaxando los derechos de la ciudadanía y considerando a unos y a otros, ciudadanos de primera, segunda y tercer categoría".