Los diputaos van rebaxar los sos sueldos un 15 por cientu

Los tres grupos con representación parllamentaria na Xunta Xeneral, PP, PSOE y IU-BA-Verdes, tán dispuestos a rebaxar les cantidaes que perciben nun 15 por cientu.

Nuna rueda de prensa ofrecida güei n'Uviéu, el voceru del PP, Ovidio Sánchez, dixo que'l so Grupu Parllamentariu tien previsto proponer l'amenorgamientu d'un 15 por cientu, non yá pa los miembros del Gobiernu, sinón a altos cargos y diputaos.

Mientres, el voceru del PSOE, Fernando Lastra, señaló, en declaraciones a Europa Press, qu'esta nun ye una cuestión qu'haya que proponer, porque dende que la plantegó'l Gobiernu "yá s'entendía que yera d'algame xeneral" pa tolos parllamentos. Asina, refugó entrar en "competiciones" sobre quién asume esi amenorgamientu o non. Nun tien  duda que se va a poner en práctica y dixo que lóxicamente va secundala'l Parllamentu asturianu, igual que nel restu de cámares españoles.
  
Pela so parte, el voceru d'IU-BA-Verdes, Jesús Iglesias, apoyó tamién una reducción del 15 por cientu nel sueldu de los parllamentarios. Sicasí, dixo que sigue esperando a que Zapatero "meta mano" a los ricos y a los bancos, y a que'l PSOE tenga "valentía bastante" pa pidi-yos qu'echen un gabitu nestos tiempos de crisis. A xuiciu d'Iglesias, el PSOE sigue sin ser a tocar a "los que paecen intocables y crearon esta crisis". Amás, consideró de máxima urxencia l'establecimientu d'una reforma fiscal "progresiva y valiente".