EDP caltién el so apueste pol ciclu combináu d'El Musel

El presidente d'Enerxíes de Portugal, Antonio Mexía, señaló en Xixón que siguen apostando pola construcción n'El Musel d'un ciclu combináu, tovía ensin axudicación pol Conseyu portuariu.

Mexía esplicó que se sigue trabayando na so tramitación y que va ser nel 2011 cuando se tome una decisión. Asina lo afirmó tres la xunta caltenida col presidente del Principáu, Vicente Álvarez Areces, y otros representantes del Principáu.
 
En respuesta a los periodistes, recordó que nun son los únicos que tán trabayando nel mesmu sen, con alusión a Endesa, anque añadió que de momentu fáenlo por separáu. Sicasí, nun quiso refugar nada y apuntó que va ser el próximu añu cuando s'adopten decisiones y si se fai de forma individual o conxunta con Endesa.
  
"Cuando toque tomar una decisión, vamos tomala", indicó enantes de destacar lo óptimo de la instalación, puesto que ye una de los meyores allugamientos pa una central d'esti tipu. Al so xuiciu, l'apuesta estratéxica "sigue siendo válida dafechu". Pese a too, dexó claro qu'hasta dempués de la tramitación nun se va tomar una decisión.
  
Na xunta falóse amás de la Terminal de Gas Licáu del puertu xixonés. Nesti sen, citó l'acuerdu con Enagás y la relación "bien positiva" con esta empresa, que ye l'axudicataria de la concesión de la regasificadora d'El Musel. Sicasí, tamién nesti casu la decisión va adoptase cuando llegue'l momentu correctu. D'otru llau, faló de la importancia de garantizar la distribución del suministru eléctricu y de gas, y apostó pola conclusión de les interconexiones ente la Península Ibérica y Francia.
  
No referente a la enerxía eólica, recordó qu'EDP foi la segunda compañía en términos de puya con más megavatios atribuyíos. Pa Mexía, lo importante ye clarificar les regles actuales pa depués del 2013, sobremanera dempués de concentrar les primes na enerxía solar, lo que uníu a la competitividá de costos de renovables eóliques, nun xustifica "la retroactividá", dixo.
  
Sicasí, dixo que los analises yeren positivos y que pensaba que se va respetase'l principiu de la tresparencia que tresformó a España a nivel mundial en términos de desarrollu d'esta industria y creando munchos empleos. "Precísense regles clares", calcó.
  
Destacó amás que'l compromisu con Asturies de la empresa refléxase nes inversiones realizaes nos últimos cinco años, que sumen 1.500 millones d'euros. A la división n'eletricidá unió l'apueste fuerte tamién pol gas, cola compra d'una parte de los activos de Gas Natural en Cantabria. Ye más, resaltó que nestos momentos son el segundu operador mayor d'España, con más del 14 por cientu de cuota de mercáu, especialmente n'Asturies, Cantabria, País Vascu y Murcia.
  
Tamién resaltó que HC Enerxía ta considerada como la meyor compañía de la cadena de servicios de la empresa n'España. Amás, aludió a l'apuesta polos eólicos, pola instalación d'El Musel y pol grupu de coxeneración que tán construyendo col Grupu Masaveu, y reseñó amás que'l grupu Soto 5 va tar acabáu en xineru del 2011. "Nós facemos lo que dicimos", repostió.
  
Mexía calcó tamién na decisión de contar n'Uviéu cola sede de la segunda compañía más importante del mundu n'enerxíes renovables, EDP Renováveis, supón una reconocencia a tol apoyu mostráu pol Principáu na creación d'oportunidaes.
 
Compromisos con Asturies

Areces, pela so parte, destacó les importantes mires de futuru de la empresa a pesar de la situación económica. Tamién resaltó les inversiones n'Asturies de la compañía y mostróse bien satisfechu del cumplimientu de los compromisos cola rexón per parte de la empresa, la cual recibió l'apoyu del Principáu.
  
El presidente rexonal apostó por saber trabayar con intelixencia y buscar la eficiencia y aseguró que xuntos van superar toles dificultaes. Insistió nel fechu de que la construcción de la regasificadora n'El Musel, sigue'l so ritmu, lo que ye "bien positivu" nes feches nes que se vive.
  
Al conceyu asistieron tamién el presidente y el conseyeru delegáu de la empresa HC Enerxía, Manuel Menéndez y Joao Mansu Netu, respectivamente, según el conseyeru d'Economía del Principáu, Jaime Rabanal, y el d'Industria y Emplegu, Graciano Torre.