Convoquen la primer movilización contra les midíes pa reducir el deficit

SAE, SATSE, STAJ, CSIF, USU, SUATEA y CSI anuncien la primer respuesta unitaria n'Asturies contra les midíes anunciaes por Zapatero, “pero nun será la postrera”, avisen.

Los sindicatos que representen a los funcionarios, van celebrar el 19 de mayu a les 6 de la tarde, una manifestación que saldrá de la Estación del Norte d’Uviéu pa espresar el so refuga a les midíes d'axuste que'l Gobiernu español quier aprobar.

“Estes midíes pretenden culpar  a los emplegaos públicos y a los pensionistes de la situación económica y facer que seyan ellos los que paguen una crisis de la que nun tienen nenguna responsabilidá”, afirmen.

Denuncien que los retayos en materia de servicios públicos que s'anuncien, “y que n'Asturies yá tamos careciendo”, son la otra cara de la moneda d'una política errática que se somete a los dictaos d'organismos internacionales, “empeñaos en facer de menos los servicios públicos y en favorecer la esternalización y privatización”.

Los sindicatos faen un llamáu a tolos emplegaos públicos y a tolos pensionistes pa esixir la retirada de les midíes p’amenorgar el déficit anunciaes por Zapatero. “Midíes que van suponer un empeoramientu de les condiciones llaborales y de l'atención a la ciudadanía de la que los servicios públicos son garante”, afirmen.

“Comprometemos a siguir convocando movilizaciones tantu sectoriales como xenerales hasta que'l Gobiernu del Estáu retire unes midíes que perxudiquen gravemente al conxuntu de la sociedá y amuesen un peligrosu camín d'esmantelamientu del llamáu estáu del bienestar”, apunten pa finar.