Ana Cano recuerda que la Llei d’Usu nun discrimina a los funcionarios

La presidenta de l’Academia de la Llingua, Ana Cano, recordó güei que la Llei d’Usu del Asturianu ye clara, “cualesquier ciudadanu pue dirixise a l’alministración n’asturianu”.

Ana Cano fixo estes declaraciones na rueda de prensa de presentación de la Universidá Asturiana de Branu. “La Llei ye clara y nun discrimina, toos somos ciudadanos anque seyamos funcionarios”, dixo en referencia a la sentencia del Xulgáu de lo Contencioso-Alministrativu Nº3 d’Uviéu, que dictara sentencia favorable al Gobiernu asturianu respeuto al contenciosu plantegáu pol funcionariu del Cuerpu Superior d'Alministradores del Principáu d'Asturies, Xurde Blanco Puente, en rellación al usu del asturianu na Alministración.
 
La sentencia afirmaba qu’un funcionariu "nun tien derechu a rellacionase cola Alministración del Principáu n’asturianu, cuando actúa na so condición de funcionariu" y que'l Principáu en nengún momentu dio-y un tratu desigual a Xurde Blanco.

La presidenta de l’ALLA recordó que’esa sentencia diz lo contrariu que l’Autu del Tribunal Constitucional, “qu’afitaba que la Llei d’Usu, el marcu llegal que tien anguaño la nuesa llingua, reconocoz que cualesquier ciudadanu podía dirixise a l’alministración, de pallabra o per escritu, n’asturianu”.

Mientres, l’alcalde de Cangas del Narcea, conceyu que va agospiar la UABRA, José Manuel Martínez, recordó qu’ellos tienen unes ordenances municipales que permiten usar l’asturianu cola alministración local "y a nós responder n'asturianu".

Amás, falando n’asturianu occidental, dixo que’l so Ayuntamientu taba comprometíu “cula defensa de la nuesa ḷḷingua dientro de las nuesas competencias”. Punxo asina como exemplu, el Serviciu de Normalización que recuperó tola toponimia “real” de Cangas del Narcea.