La Universidá Asturiana de Branu quier abrir l’Academia a la sociedá

|

La UABRA va facer qu’Universidá y Academia, “dos instituciones a vegaes acusaes de tar al marxe de la sociedá”, participen col entornu nel que tán, en pallabres d’Ana Cano.

La presidenta de l’Academia de la Llingua, l’alcalde de Cangas del Narcea, José Manuel Martínez, y de la vicerrectora d'Estensión Universitaria, Covadonga Betegón, presentarón güei públicamente la UABRA, “un finxu importantísimu pol que l’Academia siempre naguó”, dixo Ana Cano.

La Universidá Asturiana de Branu, onde a partir d’agora s’inxertan los Cursos de Branu de l’Academia, qu’algamen esti añu la so XXVIII edición, tien como oxetivos cimeros la capacitación llingüística n’asturianu, la formación d’investigadores en filoloxía asturiana y l’estudiu ya investigación de la realidá social y cultural del país, “una formación con un enclín universitariu del asturianu, el noyu fundamental, y de lo que güei ye Asturies”.

La presidenta de l’ALLA comentó que na UABRA, el conceyu de Cangas del Narcea va ser una parte activa, “con esposiciones, conciertos, conferencies, teatru  y actuaciones musicales que abrirán la UABRA al entornu que la acueye como sede permanente”.

Asina, amás de los cursos d’asturianu, traducción y gallego-asturianu, la UABRA va acoyer cursos de lliteratura, hestoria, investigación, periodismu, música, investigación dialeutal o lliteratura, como yá avanzaba Asturies.com. Al empar de too ello, p’amosar la implicación de la UABRA col conceyu que l’agospia, el Teatru Toneru y la Casa de la Cultura de Cangas de Narcea tamién van acoyer delles xeres complementaries.

Asina, na Casa de la Cultura va asitíase una esposición de la obra escultórica de Pablo Manzano, amás d’una conferencia de Xosé Antón Suárez Ponte, del grupu d’investigación de biloxía tumoral,  titulada ‘El cáncer: estáu actual de la investigación y perspeutives de futuru’. Mientres que’l Teatru Torenu, acoyerá la obra de Nun Tris ‘El criáu de dos amos’ y un conciertu de Chus Pedro, que tará acompañáu por Gabino Antuña.

Ana Cano valoró esta nueva Universidá Asturiana de Branu como un puntu de referencia nel conveníu ente l’Academia y la Universidá, “un pasu más nel compromisu de la Universidá col asturianu”. Un compromisu que tamién destacó la vicerrectora d'Estensión Universitaria, Covadonga Betegón, que recordó la responsabilidá de la institución con Asturies, la so cultura y la so llingua, dalgo que se recueye nos sos Estatutos, “onde s’establez que naide pue ser discrimináu por mor de la llingua”, afirmó.

Mientres que l’alcalde de Cangas del Narcea, José Manuel Martínez, calificó de privilexu poder trabayar “con dos de les instituciones más importantes d’Asturies”. El Conceyu será l’encargáu de ceder les instalaciones pa que los 120 alumnos de los cursos puean dormir (Escuela-Hogar de Cangas), amás de facilitar espacios pa les clases (IES de Cangas del Narcea) y los actos de divulgación cultural (Casa de la Cultura y Teatru Torenu).

Toles actividaes de la Universidá Asturiana de Branu van celebrase ne Cangas del Narcea énte’l 2 y el 13 d’agostu. Les persones interesaes n’apuntase a dalgún de los cursos van poder facelo a partir del 24 de mayu y hasta’l 4 de xunu na sede de l’Academia.

Compromisu de l’Academia cola formación

Ana Cano recordó que dende la so creación, l’ALLA tuvo l’enfotu de formar a los enseñantes. Poro, entamó en 1983 y por mandáu del Principáu, los cursos de llingua asturiana pa enseñantes.

Asina foi hasta qu’en 1994, “y como yera lóxicu”, la Universidá d’Uviéu encargóse de la formación del profesoráu. Sicasí, l’ALLA nun abandonó los cursos de branu y quixo abrilos a la sociedá en xeneral, entamando nuevos cursos d’afondamientu, formación especializada ya investigación lingüística.

Unos cursos qu’añu tres añu algamen nes encuestes de valoración de los estudiantes la máxima puntuación, “mesmamente vino xente a facelos de fuera d’España”, solliño Ana Cano.

 

Contador Estadistiques