Netanyahu afala la integridá israelina de Xerusalén col Antiguu Testamentu

El primer ministru israelín, Benjamín Netanyahu, afirmó nel Parllamentu que'l nome de la ciudá apaez mentáu hasta 850 veces nel Antiguu Testamentu y "nin una sola" nel Corán.

Mientres una sesión parllamentaria en conmemoración de la ocupación de la ciudá na guerra de los Seis Díes, en 1967, Netanyahu aseguró que "Xerusalén" y el so equivalente n'hebréu, "Sión", apaecen mentaos hasta 850 nel Antiguu Testamentu, el canon xudíu de la Biblia. "Encamiénto-yos que comprueben cuántes veces se menta Xerusalén nes escritures sagraes d'otres relixones", añadió.
  
Interrumpíu por un diputáu de la minoría árabe israelina, Netanyahu respondió con una pequeña llección d'historia comparada: "ya que lo entruga, Xerusalén méntase 142 veces nel Nuevu Testamentu y nun hai nin una sola mención a los 16 nomes árabes de Xerusalén nel Corán, anque dicen que nuna interpretación ampliada del Corán del sieglu XII hai una referencia a Xerusalén nun pasaxe".
  
El xefe negociador de la Organización pa la Lliberación de Palestina, Saeb Erekat, declaró darréu que "ye de mui mal gusto utilizar la relixón p'afalar al odiu y al mieu".