Suatea llama a la movilización contra les midíes de Zapatero

Pa Suatea, les midíes de Zapatero son la puerta a la conxelación del emplegu públicu. Amás, señalen que les clases desfavorecíes van cargar coles consecuencies.

El sindicatu diz que l'amenorgamientu de xornales y posterior conxelación implica necesariamente lo mesmo pal emplegu, como tamién el deterioru y amenorgamientu na calidá de los servicios públicos, “un pasu más escontra la privatización”.

Afirmen que se tán xustificando midíes qu'amenorguen derechos llaborales y sociales: “pensiones, xubilaciones y maternidá son el primer pasu pa siguir xustificando l'aumentu de la edá de xubilación o la precarización del emplegu y abaratamientu del despidu, esto ye, una reforma llaboral claramente a la baxa”.

Les midíes anunciaes con respeuto al xornal del funcionariáu, escuenden pal sindicatu a una campaña orquestada na llinia de desacreditar a amplios sectores del empléu públicu, “avalando la externalización, privatización y desregulación nel tresporte, la enseñanza o la sanidá”.

Suatea diz que’l retayu de les inversiones públiques supón l’amenorgamientu y precarización de contratos, aumentu del paru, amenorgamientu de servicios ya infraestructures, “el gastu públicu en servicios de primer orde va vese amenorgáu, más de lo mesmo: les clases más precisaes van sufrir los efectos.

Pa Suatea les perres habríen de sacase del aumentu de los impuestos sobre les rentes más altes y sobre les grandes fortunes, col combate real del fraude fiscal y el control políticu, “la xestión económica de les grandes corporaciones financieres que, amás, foron les grandes beneficiaries d'aportaciones económiques que paguemos ente toos y toes”.

El sindicatu diz que les midíes anticrisis, y les consecuencies y efeutos de les mesmes, esixen una movilización social importante ya inmediata y fai un llamáu a toles organizaciones sindicales y sociales pa unir trabayos. El sindicatu va proponer movilizaciones énte la Delegación del Gobiernu y va participar, el domingu próximu, nes movilizaciones que van tener llugar en Madrid.