Cangas, capital del conocimientu n’asturianu

Güei va presentase la Universidá Asturiana de Branu (UABRA) qu’entamará’l so funcionamientu n’agostu en Cangas del Narcea col oxetu de la tresmisión de conocimientu n’asturianu.

La cita va ser a les 12.30 hores nel Edificiu Históricu de la Universidá d’Uviéu. Pa presentar la iniciativa tarán presentes nel actu la Vicerrectora d’Estensión Universitaria, Cultura y Deportes, Covadonga Betegón Biempica, la presidenta de l’Academia de la Llingua Asturiana, Ana María Cano González, y l’alcalde del Conceyu de Cangas del Narcea, José Manuel Martínez González, yá que la villa de Cangas va ser la sede de la UABRA.

Na mesma, van quedar encartiyaos los cursos de branu de l’Academia, qu’hasta l’añu pasáu teníen llugar en Santantolín, n’Ibias. La UABRA surde, según anunciaba Ana Cano nel pasáu Día de les Lletres, colos oxetivos de la formación na investigación en filoloxía asturiana y la formación científica n’otres árees, pero tomando l’asturianu como llingua de comunicación. Amás de l’apertura y l’espardimientu social, per ente medies d’esposiciones, conferencies, actuaciones musicales y teatrales.

Precisamente los cursos, inxestaos agora na UABRA, van abrir la so inscripción el próximu 24 de mayu. Éstos van desendolcase nel IES Cangas del Narcea ente’l 2 y el 13 d'agostu, mientres que la Escuela hogar Cangas va acoyer l’agospiu de les persones que van acudir en rexime internu.

Amás de los cursos d’asturianu (nivel básicu y avanzáu) y de gallego-asturianu (qu’esti añu ta na segunda fase), la UABRA plantega pal presente añu cursos de traducción, internet, lliteratura, hestoria o llocución periodística, ente otros.

El cursu de traducción al asturianu ta empobináu por Xosé Lluis García Arias, y tamién participen como profesores Ana Cano y Xosé Antón González Riaño. El cursu quier presentar sintéticamente los presupuestos teóricos que rixen la traducción a una llingua minoritaria.

Mientres que ‘Internet y asturianu: aplicaciones socio-educatives’, quier averar al profesoráu d’asturianu a los recursos qu’ufre la rede pal deprendizax oral y escritu del idioma del país. El so coordinador ye David Guardado Díez, cofundador d’Asturies.com, participen tamién como profesores Xulio Berros y Xabiel García Pañeda.

Los cantares, bailles ya instrumentos musicales asturianos tamién tienen el so espaciu na UABRA, de la mano de Xuacu Amieva, con un cursu nel que quier afondase nel conocimientu de los cantares, bailles ya instrumentos populares dende la perspeutiva de la so presencia na escuela. Participen como profesores Xosé Antón Fernández ‘Ambás’, Maribel Parrongo y Covadonga Muñíz.

Esti añu tamién hai un cursu dirixíu a los periodistes col que se quier facer un averamientu a la llocución en llingua asturiana. Dirixíu por Prospero Morán, cuntará con Cristobal Ruitiña, Rubén Martín-Llames y Sonia Avellaneda como maestros.

‘La lliteratura asturiana nel aula d’Educación Primaria’ ye’l cursu empobináu por Iris Díaz Trancho, cuntando con Pablo Rodríguez Medina y Xandru Armesto como profesores. Esti cursu quier analizar les posibilidaes de la lliteratura xuvenil nes clases y va cuntar con delles actividaes de calter complementariu.

La investigación dialeutal, toponímica y de tradición oral va tar en Cangas del Narcea de la mano de Xosé Lluis García Arias, amás de la participación d’Ana Cano, Iván Huerga, Héctor Xil y González Riaño. Al traviés d’esti cursu quieren afondar nes téuniques rellacionaes colos trabayos de campu, encuestación y primeros pasos na investigación y descripción llingüística, na toponímica y na  lliteratura oral.

Pa finar, habrá un cursu d’entamu a la investigación hestórica de la lingua asturiana. Coordináu pola presidenta de l’Academia, Ana Cano, y dirixíu a estudiantes y llicenciaos en Filoloxía a los que-yos pruya afondar na conocencia de la hestoria de la llingua y les carauterístiques del actual procesu de normalización.

Estos Cursos tienen reconocencia oficial per parte de la Conseyería d'Educación, polo que son reconocíos como Programes Formativos dientro del currículum del profesoráu. Mientres que los d’asturianu y gallego-asturianu son Cursos d'Estensión Universitaria dirixíos a los estudiantes de toles estremaes carreres universitaries, polo que los  que participen nellos podrán algamar, respeutivamente, 6 y 4'5 creitos de llibre configuración.
 
Más información na web de l'ALLA