UNA encamienta al Principáu a desmarcase del “xiru a la derecha”

UNA diz que si’l Principáu tien que se desmarcar de les midíes de Zapatero, “sinón demostraríen que son una marioneta de Madrid y que'l so calter d'esquierdes ye un meru engañu”.

Per aciu del so voceru, Faustino Zapico, la organización treslladó la esmolición énte les midíes anunciaes pol gobiernu Zapatero, “yá que van poner en claru peligru la recuperación económica y suponen un voltiar a la derecha de la política económica, pa que los que causaron la crisis nun sufran nengún sacrificiu y castigar los ciudadanos que lo tán sufriendo”.
 
Zapico llamentó que s'apueste por recortar gastos sociales y desprotexer a les persones que más lo precisen. Amás, refuga toles midíes pa regular los mercaos financieros, “daqué que se prometió hasta fartar nel entamu de la crisis, nin un aumentu de la tributación sobre les rentes más altes, sobre manera les del capital, que nun tán sufriendo nengún costu de les crisis que provocaron”.

UNA cuida “inalmisible” que nin siquiera se recupere l'impuestu de padremuñu, “tradicional del nuestru sistema tributariu y que tenía un claru calter progresivu y al empar suponía una importante recaldación” y nun se planteguen midíes reductores del gastu importantes “nin en gastos militares, nin na casa real nin nes relaciones
cola Ilesia”.

Tamién-yos resulta negativu l'amenorgamientu n'inversiones yá que camienten qu’un Estáu tien que poner los recursos p'ameyorar l'actividá productible, “colo que la midida namás amuesa que'l gobiernu socialista sabe que gran parte de los proyeutos que se diben facer namás se xustificaben en sigo mesmos y que nun van producir meyores”.

UNA camienta que la solución ye abandonar la megalomanía y apostar pola innovación, les nueves tecnoloxíes y les enerxíes renovables, “qu'ameyoraríen de forma sustancial la competitividá de la nuestra economía, que ye'l verdaderu llastre pal nuestru espoxigue y que nenguna de les midíes del gobiernu incide nello”.

Según Zapico, el gobiernu Zapatero “ta faciéndonos pagar les midíes populistes como l'amenorgamientu llineal de 400,00 € d'impuestos a toes la rentes, los 2.500 € del cheque ñácaru pa toles rentes” y esa falta de rigor pagaránlo “pensionistes, funcionarios y trabayadores qu'a cuenta de ganar menos y/o perder derechos, van pagar el furacu provocáu pol rescate bancariu”.

Zapico, ante l'anunciu de retayar 6.045 millones na inversión pública estatal, esixó que se concrete en qué grau va afectar a Asturies esa midida y que se priorice la inversión que redunde en beneficiu del bien común y de los sectores más desfavorecíos y non de grandes empreses “que precisen parte de les infraestructuras que se tán creando pa especular y dexar en Asturies les consecuencies negatives de les mesmes”.

En relación col amenorgamientu de 1.200 millones del gastu de les Comunidaes Autónomes y les entidaes locales, el voceru d'UNA esixó que dende'l Gobiernu asturianu garantícense los servicios públicos y la necesaria inversión en sanidá y servicios sociales, amás de desmarcase públicamente de Zapatero.

Del mesmu mou, tampoco nun ven tolerable “criticar les midíes pa autoreafirmase como organizaciones d'esquierda, pero sofitar un gobiernu qu'aplaude midíes de la derecha puro y duro”, concluyó Faustino Zapico.