COAG entama una campaña de movilizaciones pola crisis agraria

COAG-Asturies va entamar una campaña de movilizaciones polos conceyos, pola "falta de voluntá política" na negociación de dellos temes básicos pa la organización.

Tinéu va ser el primer conceyu qu'acueya les movilizaciones. La cita va ser a les 12.30 hores na plaza'l Conceyu. La Secretaria Xeneral de COAG-Asturies, Mercedes Cruzado, destacó que "ye bien importante dar una continuidá a les movilizaciones entamaes nel tema llecheru y amplíales a tolos sectores, porque tolos ganaderos tán mal". "Nun podemos permanecer perennes mientres la nuesa situación se deteriora día a día", dixo.
  
Asina, nel sector llecheru la organización de nunca la falta d'un apueste claro pol mesmu, frente a les importaciones de lleche foriato; la opacidá o falta de tresparencia nel sector, poles guerres comerciales de les grandes empreses de la distribución qu'utilicen la lleche como productu reclamu, y el fuerte desequilibriu nel poder de negociación de productores a favor d'otros eslabones de la cadena llechera.
  
Sobre'l sector cárnicu, como denominador común col sector llecheru, los precios del vacunu de carne, lloñe de recuperase, tán en cayida llibre, cola inesplicable paradoxa de que l'últimu informe de la Unión Europea declara una cayida de la producción de carne del 0,7% y que'l déficit comunitariu de carne de vacunu crez cada añu.
  
COAG indicó qu'a too ello hai qu'añadir la "más que preocupante noticia" de que la Comisión Europea decidiera rellanzar les negociaciones de llibre comerciu, con MERCOSUR (Arxentina, Brasil, Paraguai y Uruguai) suspendíes dende'l 2004.  
  
"Esto significa, nin más nin menos, una mas que previsible entrada masiva de carne d'estos países, col consiguiente fundimientu del preciu de la mesma. A nivel comunitariu fálase yá de perdes pa la ganadería comunitariu d'ente 3.000 a 5.000 millones d'euros al añu", manifestaron dende la organización agraria.
  
Por too ello, dende COAG-Asturies faen un llamáu a tol sector agrariu y a toos aquellos sectores que dependen pa sobrevivir en mayor o menor midida de los ganaderos y llabradores, asina como a les corporaciones de los distintos conceyos frente a los que van tener llugar les concentraciones de protesta.