El Bloque diz que Zapatero ye una versión a la inversa de Robin Hood

El Bloque pide una respuesta unitaria énte les midíes pa reducir el déficit y fai un llamáu a la movilización “yá que se tomen midíes que carguen l'axuste sobre los trabayadores”.

“El Bloque por Asturies tien claro que güei s'acaba de presentar en sociedá la nueva versión de Robin Hood, protagonizada por José Luis Rodríguez Zapatero, que roba a los probes pa da-ylo a los ricos, que roba a los trabayadores pa dexar que los responsables de la crisis sigan robando con total impunidá”, afirma’l partíu.

Unes midíes que según la organización, va suponer recurtiar los servicios y les inversiones públiques, asina como la Llei de Dependencia. “Quieren facer a emplegaos públicos y pensionistes responsables de la crisis”, señalen. Tamién camienten que les midíes contemplen más dineru pa la guerra, “más soldaos p'Afganistán y menos fondos pa la cooperación y la solidaridá”.

El Bloque por Asturies considera qu'esti ye'l primer pasu d'un Gobiernu “qu'apostó dende siempres pol empléu precariu y ensin derechos, y qu'agora al traviés de la reforma llaboral va querer apostar pola flexibilización llaboral, el despidu llibre y recurtiar más les pensiones y les prestaciones de la Seguridá Social”.

La organización nacionalista considera indignante que'l Gobiernu de Zapatero, “que mientres meses negó la crisis, quitó impuestos a los ricos y abrió la barra llibre d'ayudes ensin tener en cuenta los ingresos”, tome agora midíes d'axuste contra les persones que más tán sufriendo la crisis y nun tome nin una sola midida contra'l fraude fiscal, la especulación financiera, los escandalosos beneficios de la Banca y les grandes fortunes.

“Esti Gobiernu llamáu socialista, dende'l más absolutu cinismu ya hipocresía, esixe apertar la petrina a los que menos tienen cuando partió miles de millones a la Banca de de baldre”, afirma la organización. El Bloque por Asturies considera qu'énte esti “ataque brutal”, la única respuesta ye la movilización unitaria.