El Gobiernu español baxa un 5% el sueldu del sector públicu

|

Rodríguez Zapatero anunció una serie de midíes pa reducir el déficit que contemplen una rebaxa d'un 5% de media de les retribuciones del personal del sector públicu dende esti branu.

Les retribuciones van conxelase nel 2011 y tamién se contempla la eliminación de la prestación por nacimientu de 2.500 euros a partir del 2011 y la rebaxa de los xornales de los miembros del Gobiernu nun 15%.
  
Asina lo punxo de manifiestu Zapatero nel Plenu del Congresu de los Diputaos, onde adelantó que tamién se suspenderá pal 2011 la revalorización de les pensiones, escluyendo les non contributives y les pensiones mínimes, y la eliminación del réxime transitoriu pa la xubilación parcial que s'aprobó nel 2007.
  
Amás, el xefe del Executivu anunció una reducción de 6.045 millones d'euros na inversión pública estatal ente'l 2010 y el 2011 y un recorte de 600 millones na ayuda oficial al desarrollu nel mesmu periodu. A les comunidaes autónomes y conceyos, el presidente pidió-yos un aforru adicional de 1.200 millones d'euros.
 
Toles midíes adelantaes esti miércoles por Zapatero incluiránse nun decretu llei que va aprobar el Conseyu de Ministros la selmana qu'entra, "pa la so entrada en vixencia inmediata", según anunció'l mesmu xefe del Executivu.
  
Precisó amás que'l vienres d'esta selmana'l Conseyu va examinar el techu de gastu de los Presupuestos Xenerales del Estáu pal 2011 y el plan d'austeridá 2011-2013, que va incorporar les decisiones anunciaes.
 
Cambios na llei de dependencia
  
Otra d'estes nueves midíes va ser eliminar la retroactividá na aplicación de la llei de dependencia, con una reforma na que se va establecer un tiempu máximu de seis meses pa la resolución de les solicitúes. D'esta forma, una vez qu'entre en vixencia la nueva norma va suprimise'l pagu de la cantidá pendiente dende que se fizo'l pidimientu. Los derechos de retroactividá que yá se xeneraron van poder pagase nun plazu máximu de cinco años.
  
El Gobiernu argumentó que la midida va permitir un importante aforru y, amás, va incentivar el pidimientu de más "servicios", que xeneren emplegu.
 
Reducción del preciu de melecines
  
Zapatero anunció, a lo último, planes pa reducir el gastu farmacéuticu, empezando por reducir el preciu de melecines non xenériques escluyíes del sistema de precios de referencia, de manera graduada, ente un 10 y un 15 por cientu, teniendo en cuenta l'añu de rexistru de les melecines.
  
Nesti capítulu, l'Executivu quier promover amás un consumu de melecines más eficiente y vinculáu a les necesidaes reales de los pacientes, adautando'l númberu d'unidaes de los envases de les melecines a la duración estandarizada de los tratamientos, d'acuerdu coles indicadiones de la comunidá científica.
  
Va facese tamién posible la dispensación de les melecines n'unidosis, pente medies del fraccionamientu de los envases, de manera que'l paciente puea mercar el númberu exactu d'unidaes que precise.
 
Oxetivu: recorte adicional del déficit
  
Estes midíes pretenden cumplir col compromisu, anunciáu'l pasada fin de selmana en Bruxeles, d'acelerar la reducción del déficit nun 0,5 por cientu del PIB adicional nel 2010 y nun 1 por cientu nel 2011 (5.000 y 10.000 millones d'euros).
  
Zapatero dixo qu'estes midíes son "imprescindibles" y procuren ser "lo más equitatives posibles" pa cumplir col compromisu d'amenorgar el déficit a niveles más cercanos al 3% nel añu 2013, y pidió un esfuerzu nacional" pa executar esti llabor.

Comentarios

Nun veo yo, que los politiquinos baxen el propiu sueldu. Siempre ye lo mesmo: ellos apoltronáos en el asientu, y los demás a pagar el patu. Nun se pa que faen les elecciones... 

Contador Estadistiques