El Principáu pauta con UXT y ANPE la nueva Llei d'Evaluación

Principáu, UXT y ANPE llegaron a un alcuerdu sobre'l Plan d'Evaluación del Profesoráu, anque cuenten cola oposición de CCOO y Suatea, que diz que la Llei ta n'entredichu.

Esti alcuerdu ye consecuencia de les lleis aprobaes na Xunta Xeneral sobre la regulación de la carrera profesional pa los funcionarios del Principáu y la evaluación docente, rematando asina un itinerariu que, según l'Alministración, tien por oxetu acreditar el llabor profesional con un reglamentu que desenvuelve la Llei d'Evolución.

Nel aconceyamientu participaron el Conseyeru d'Educación y Ciencia, José Luis Iglesias Riopedre; la Conseyera d'Alministraciones Públiques y Vocera del Gobiernu, Ana Rosa Migoya; el Secretariu Xeneral de FETE-UXT; Daniel Rodríguez; y el Presidente d'ANPE, Gumersindo Rodriguez.

El titular d'Educación señaló que l'alcuerdu alcanzáu respuende a les mires de la mayoría del profesoráu, consolidando'l cobru del complementu específicu a los que lo perciben dende l'añu 2007, y abre la posibilidá de que puean entamar a cobralo los docentes que se xunten nesta nueva fase.

Anguaño, benefíciense del complementu retributivu unos 8.000 docentes y podrán incorporase unos 1.300 más nel nuevu procesu.  Estes retribuciones xuben a una cuantía bruta añal de 1.600 euros pa los maestros de Primaria y 2.500 pal profesoráu de Secundaria.

Dende’l Principaú camienten que los indicadores d'esti Plan d'Evaluación afáense a les funciones de tolos docentes, definiéndose un total d'ocho modelo distintos en función de les xeres y cometíos que desempeñen. “Ocho modelo distintos porque l'oxetivu ye afaer la evaluación a la función especifica que ta desenvolviendo cada sector docente. Nun se trata d'un exame, sinón d'ameyorar el funcionamientu y la calidá del sistema educativu. Y, nesti casu, ameyorar el nivel de compromisu de los docentes cola institución escolar, por eso pagamos un complementu adicional”, esplicó'l Conseyeru.

Mientres, la Conseyera d'Alministraciones Públiques, Ana Rosa Migoya, punxo de relieve que, con esti alcuerdu, equiparen a los docentes col restu de funcionarios del Principáu.  

Suatea recuerda que la Llei ta n’entredichu

Suatea diz que la Llei d’Evaluación sigue tando n’entredichu, “por muncho trunfalismu que manifieste’l Gobiernu y los que collaboren con él”, recuerden que les resoluciones nes que se sofita foron declaraes nules como publica'l BOPA del llunes 10 de mayu de 201. Amás, afirmen que la Llei afonda na discriminación salarial.

“Teniendo en cuenta lo discriminatoriu d'esta llei pa casi'l 50% de los docentes asturianos, y los próximos amenorgamientos salariales aunciaos por Zapatero, l'abismu discriminatoriu en materia salarial promovíu polos dos sindicatos collaboracionistes amplíase radicalmente”, afirmen.

Recuerden qu’ente los discriminaos agora yá nun tán namás los llamaos non firmantes, “sinón tamién el profesoráu interín y el de menor antigüedá, por non cumplir los años d'esperiencia, asina como los llegos por Concursu de Tresllaos”.

“N’Asturies, como güei reconocen los mesmos sindicatos firmantes, tamos los últimos d’España en salariu gracies a los alcuerdos roblaos por ellos, que vinieron sofitando la errática y murnia actuación gubernamental en materia educativa”, señala’l sindicatu.

Dende Suatea resumen la trayeutoria d’alcuerdos sindicatos-Principáu, nel esmantelamientu de la Conseyería d'Educación, la non estabilidá pal profesoráu interín, la inesistencia de negociaciones colos representantes docentes mientres dos años, la implantación d'evaluaciones y sobrecarga de trabayu burocráticu nos centros, l’amenorgamientu de servicios públicos d'enseñanza y el favorecimientu de la enseñanza privada.

El sindicatu educativu sigue la so campaña d'asamblees pa informar sobre les actuaciones xudiciales entamaes. La próxima va celebrase'l  martes 18 de mayu a les 6 de la tarde nel IES Aramo d'Uviéu.