Gotor diz que les places de determinaes árees "nun van cubrise"

El Rector dixo que nun van prescindir de personal porque Bolonia requier más profesoráu, anque nun van cubrir les places vacantes polos problemes presupuestarios.

Gotor fixo estes declaraciones güei a los periodistes antes de participar xunto al conseyeru de Salú y Servicios Sanitarios del Principáu, José Ramón Quirós, na presentación del resultáu de la Campaña Universitaria de Donación de Sangre, que se celebró nel Edificiu Históricu.

De la mesma manera, xustificó les declaraciones realizaes ayeri pol conseyeru d'Educación, José Luis Iglesias Riopedre, sobre una posible reducción nes plantiyes alegando que de xuru "nun quería dicir eso".

El responsable de la institución reconoció que la Universidá llogró acabar el cursu pasáu con un remanente nel presupuestu que-yos "permitirá vivir" nel 2010, pero negó que seyan siete millones d'euros, como caltuvo güei'l conseyeru na Xunta Xeneral, sinón "muncho menos". "Existe porque nun gastemos y aforremos; contentos teníen que tar", retrucó, refiriéndose a les pretensiones de l'Alministración autonómica pa que la Universidá reduza'l gastu.
  
Gotor repitió que la incorporación al Espaciu Européu d'Educación Superior fai prioritaria l'apuesta pola docencia y la investigación y ye, anunció, "no que se van centrar".