Quirós encamienta a la UTE que diga si quier siguir col HUCA

El conseyeru de Salú  afirmó que les empreses que conformen la UTE que ta construyendo'l nuevu HUCA, "tienen que poner sobre la mesa si quieren siguir o non colos trabayos".

"Nun diba ser un inconveniente cambiar de constructora si ye que la UTE actual nun se considera capacitada o con ganes d'acabar la obra", dixo José Ramón Quirós. El conseyeru  manifestábase asina en declaraciones a los medios antes de participar nel actu d'entrega de los XX Premio Asturies d'Arquitectura.
  
"Si nun quieren facer la obra l'Alministración axudicaríala de la forma más urxente posible y eso nun xeneraría que s'allargaren muncho los plazos. Los plazos puen alterase si retrasamos la resolución de la negociación", dixo'l conseyeru.
  
Indicó qu'hai dos partes que tán negociando y afirmó que ye cierto que les empreses tienen la capacidá de rescindir el contratu si asina lo consideren, polo que fai falta que lo digan. Asina, manifestó que ye lóxico qu'apaezan tensiones nun momentu de negociación. "Creo qu'hai que siguir dexando trabayar a Gispasa porque realmente nun hai nada nuevo", manifestó.
  
Sobre los cambios nel proyectu, Quirós indicó que "si por obra nueva s'entiende cambiar un tabique pues val", porque se trata de meyores que respuenden a les necesidaes de los profesionales, y negó de manera rotunda que se tea falando de nuevos edificios, tal como publica güei un mediu de comunicación.
  
Asina calcó en que lóxicamente hai meyores que nun taben nel proyeutu inicial y qu'hai qu'estudiar qué costu suponen, pero de nenguna manera trátase de nuevos edificios.
  
Per otra parte'l conseyeru negó de manera rotunda que la conseyería y el Gobiernu tenga nos sos planes zarrar algún de los centros sanitarios una vez que tea inauguráu y funcionando'l nuevu HUCA.
  
"Rotundamente nun ta na axenda d'esti gobiernu zarrar nengún centru sanitariu, tolo contrario, queremos reforzar toles árees sanitaries", dixo Quirós, qu'alvirtió que sicasí lo que nun ye posible ye "facelo too y yá".