Valledor, Cañal y Penche declaren nel TSXA pol recursu d'ACA

L'ex conseyeru de Xusticia Valledor, el diputáu del PP, García Cañal, y el director de la Fundación Asturiana de la Enerxía, Manuel Penche, comparecieron como testigos nel TSXA.

Los tres tán citaos na fase de pruebes, depués de que l'Agrupación de Colectivos Asturianos interpunxere un recursu na estaya tercera de lo Contencioso Alministrativu del Tribunal superior de Xusticia d'Asturies TSXA, énte la negativa del Gobiernu de facilita-yos l'espediente de la 'Estratexa Enerxética Asturiana con horizonte 2007-2012', aprobáu pol Conseyu de Gobiernu del Principáu n'abril del 2007.
  
En declaraciones a Europa Press, el presidente d'ACA, Domingo Goñi Tirapu, criticó les contestaciones realizaes per parte del Executivu rexonal a la so solicitú de contar col mentáu espediente. Asina, señaló que "nun ye serio" que dende la Conseyería d'Industria argumente la imposibilidá d'unviar la información medioambiental correspondiente, puesto qu'el documentu ye de planificación y non ambiental.
  
Pa Goñi Tirapu, "detrás d'esi razonamientu escuéndese la verdadera razón que movió esti procesu, que ye torgar la participación pública y la información a la ciudadanía, en decisiones vitales" pal futuru ambiental, territorial, industrial, económicu y llaboral d'una comunidá
  
D'ehí que decidieren acudir a la TSXA p'algamar non el documentu, sinón tol espediente que dio llugar al mesmu. Asina, esplicó que toles conseyeríes tuvieron que facer aportaciones y qu'esi espediente esiste. "Esta ye la única comunidá autónoma que tramitó de manera irregular y allegal el procedimientu de mandar a Madrid les propuestes en materia enerxética", sostienen dende ACA, qu'añaden que n'otros territorios sí hubo información pública y tramitación parllamentaria.
  
Según señaló Goñi Tirapu, Valledor, al que se citó porque p'ACA taba nel Gobiernu nel momentu d'aprobase la estratexa, dixo güei na so declaración que tando él nel Gobiernu nun s'aprobara nada. Pela so parte, Penche, citáu como director de la Fundación Asturiana d'Enerxía, que redactó'l documentu, acabó reconociendo que'l Gobiernu encargára-yos el mentáu trabayu, según Goñi. "Diben con mires de tapecer", señaló.
  
No referente a García Cañal, esplicó que nuna Comisión d'Industria del Parlamentu asturianu'l Gobiernu yá almitió l'aprobación de la estratexa. Amás, puesto que foi miembru del Executivu asturianu, cuando gobernaba'l PP n'Asturies, esclaró que ye imposible que nun se llevante acta en Conseyu de Gobiernu d'una aprobación d'estes característiques, y añadió qu'esi tipu de trabayos siempre lleven el so correspondiente espediente. ACA tamién solicitó información al Ministeriu sobre esti asuntu.

Vía penal
  
Pero ACA tien previsto "llegar hasta'l final" nesti asuntu. Goñi Tirapu diz que tanto si se demuestra que nun hubo aprobación oficial en Conseyu de Gobiernu como si se constata que se tuvo "tapeciendo mientres añu y media" habría posibilidá de recurrir a la vía penal.
  
Asina, l'oxetivu d'ACA ye, una vez que se consiga l'espediente y l'acta d'aprobación, acudir a los tribunales pa pidir la nulidá del documentu. "Basta de rise de los ciudadanos", caltuvo Goñi