Riopedre diz que'l cobru va xeneralizase enantes de la sentencia

José Luis Iglesias Riopedre indicó la posibilidá de que la entrada en vixencia de la Llei d'Evaluación, se produza "enantes" que se llegue a executar la sentencia del TSXA.

El fallu declaró nules les resoluciones del Gobiernu del Principáu sobre la Carrera Profesional. "De primeres, enantes va ser el cobru que la resolución definitiva d'esi recursu", apuntó Riopedre enantes de participar nel actu escolar pa la llectura de poesía de Miguel Hernández por cuenta del so centenariu nel Colexu Públicu La Gesta I d'Uviéu.

La petición d'execución de sentencia presentada por Suatea esixe'l "inmediatu cese del pagu y la declaración de disconformidá a derechu del acuerdu del Conseyu de Gobiernu d'Asturies de 18 de payares del 2009, que valió de base pa la Llei d'Evaluación docente y los sos incentivos".
  
Al respeuto, Riopedre señaló nun saber "qué efeutos puea tener", polo que dixo que va haber qu'esperar a ver cuándo y qué contesta la sala del tribunal. "Vamos ver qué pasa con eses sentencies, porque de xuru van recurrise", dixo tanto en relación coles vinculaes a Suatea como a otros sindicatos. "Nun creo que tengan una presencia inmediata nel procesu", añadió.
  
D'esta manera, fixo referencia a la celebración güei de la segunda sesión de la Mesa Sectorial d'Educación, na que Suatea va caltener la so posición contraria a la Llei d'Evaluación Docente. El conseyeru resaltó que "a parte de Suatea, hai otros sindicatos que lu apoyen" y repitió que "la inmensa mayoría de los docentes que tienen la posibilidá de cobrar tán deseando que se resuelva'l tema de la evaluación y poder cobrar".
  
Asina, el conseyeru recordó que la Llei aprobóse pola Xunta Xeneral y agora ta trabayándose nel reglamentu que lu apoya, pa qu'una vez acabáu'l procesu de la so aprobación pola Mesa Sectorial y tres algún trámite más, entre en vixencia. "Espero que cuanto antes empiece a funcionar y anque va tardar tovía un tiempu va ser esti añu", señaló.
 
Amás, el conseyeru trató la necesidá d'adautar presupuestos pa reducir el déficit. Riopedre llendóse a dicir que nel so departamentu nun hai tovía nenguna decisión tomada al respecto porque "ye en Conseyu de Gobiernu onde se tomen eses decisiones y va haber que falar".
  
"Espero que nel Conseyu de Gobiernu correspondiente se plantegue'l tema polo xeneral y caún va tomar les sos posiciones", argumentó reconociendo que l'axuste presupuestariu ye "necesariu". "Rescampla y naide lo pon en duda, el tema ta en ver cómo se parte esi sacrificiu nes distintes conseyeríes", remarcó.
  
De la mesma, desmarcóse de la postura de la Universidá d'Uviéu en relación a la rebaxa de personal. "Ye'l so problema non el míu", dixo. "Ellos tienen les sos competencies y yo tengo les míes, y el tema de personal de la Universidá, ye competencia de la Universidá. n'Educación financiamos al traviés del presupuestu, y caún tien les sos propies responsabilidaes", remarcó.