Llaviana convoca'l IX Concursu de Narraciones n'asturianu

Yá ta abierta la convocatoria del IX Concursu de Narraciones Curties Conceyu de Llaviana, que ta empobináu pol Serviciu de Normalización Llingüística.

Los trabayos, tanto en prosa como en versu, han tar redactaos en llingua asturiana, respetando les normes ortográfiques y gramaticales de l’Academia de la Llingua Asturiana, con un llargor máximu de 10 fueyes.

Va haber tres premios, el primeru con una dotación de 600 euros, el segundu con 300 y l’últimu con 150. La entrega de premios sedrá’l día 13 de xunu de 2010, coincidiendo cola celebración del V Festival de la Sidra de Llaviana.

Los cuentos tienen de ser inéditos, non premiaos n’otros concursos lliterarios y ensin tar suxetos a nengún compromisu d’edición. El tema sedrá llibre valorándose los trabayos que recueyan tradiciones, costumes, llugares, fechos, paisaxe d’Asturies y, sobre manera, del conceyu de Llaviana y el Valle del Nalón.

.El xuráu va tar integráu por José González Díaz, responsable de la Conceyalía de Promoción del Asturianu; María García Fernández, responsable del Serviciu de Normalización Llingüística; Pablo Xuan Manzano Rodríguez, miembru de l'Academia de la Llingua Asturiana; y dos persones venceyaes a la promoción de la Llingua Asturiana.

Les obres van remitise, en sobre zarráu al Serviciu de Normalización Llingüística de Llaviana (Plaza Armando Palacio Valdés, 1). El plazu d'almisión de trabayos acaba'l vienres 4 de xunu. Toles obres presentaes sedrán propiedá del Ayuntamientu de Llaviana, que se reserva'l derechu de la espublización, citando, en tou casu, la procedencia.