Una xueza de l'Audiencia Nacional torga a un acusáu espresase n'asturianu por nun ser "llingua cooficial"

|

La xueza Ángel Murillo torgó güei al independentista asturianu, Fernando González Rodríguez, xulgáu na Audiencia Nacional por estragos terroristes, que s'espresare n'asturianu por nun ser "una llingua cooficial", y alegó qu'ella, nacida n'Estremadura, "tamién podía facelo en castúo (llingua tradicional d'esta comunidá), pero entós nuna la diben entender".

La maxistrada, presidenta de la Estaya Cuarta de la Sala de lo Penal, adoptó esta decisión cuando l'acusáu, Fernando González Rodríguez, espresó la so intención de "falar en llingua asturiana" y aseguró que, de nun poder utilizala, diba renunciar al so derechu a declarar demientres la vista, na que s'enfrentaba a ocho años de cárcel por supuestamente tentar de colocar, en setiembre del 2005, un artefautu esplosivu na sede del PSOE de L'Infiestu (Asturies).

"Nun tien derechu a falar na llingua que-y dea la gana a usté", alvirtió-y la xueza Murillo enantes d'encamentalu a espresase en castellán porque ye "l'idioma oficial" y lu conocía "perfectamente". La decisión de la presidenta provocó que la defensa del acusáu presentare una propuesta ante'l tribunal, al qu'acusó d'incumplir l'artículu 24 de la Constitución por nun permitir al so cliente "espresase na so propia llingua".

Dempués, la lletrada del independentista, Begoña Lalana, solicitó un recesu pa tentar de que'l so cliente reconsiderare la decisión de nun declarar, anque ésti se caltuvo na so posición. Asina, a la entruga del fiscal Miguel Ángel Carballo, de si confirmaba la so declaración policial, contestó: "sí, ratifícola". Esti fechu motivó que la xuez-y torgare siguir declarando n'asturianu.

"UN BICHU PRENDÍU"

Demientres la vista, que s'aplazó hasta'l próximu 29 de xineru, cuando se prauticaba la prueba pericial, los axentes que detuvieron al acusáu esplicaron que-y siguíen dende'l 2003 pa investigar si podía tar prestando apoyu a miembros d'ETA, puesto que demientres una estancia na cárcel de Villabona conoció a integrantes d'esta organización terrorista, y agospió na so casa a dalgunos de los sos familiares que diben a les visites.

L'instructor del atestáu correspondiente a la detención declaró que la Policía taba investigando la colocación d'otros artefactos asemeyaos y que sospechaben del acusáu porque n'ocasiones anteriores ésti se treslladare hasta'l País Vascu pa participar n'actos convocaos por grupos de la izquierda 'abertzale', como Gestoras Pro Amnistía o Segi.

Según el relatu de los axentes, cuando se produxo la detención, l'acusáu taba nel interior d'un vehículu aparcáu a unos cien metros de la sede del PSOE de L'Infiestu. Nesti momentu, los alvirtió de que xunto a los pedales había un "bichu prendíu" que diba esplotar, en referencia al artefautu, qu'ún de los axentes algamó desactivar apagando les sos meches.

En concreto, l'esplosivu taba compuestu por gasolina, un aerosol y dos voladores manipulaos que, al xuiciu d'un peritu policial que declaró ante'l tribunal, yera "una imitación precisa de los de 'kale borroka'".

ANAGRAMES D'ETA

Amás, llevaba con él tres fueyes con plantiya a bolígrafu col mensaxe 'Puxa Asturies Dixebrá, Puxa Asturies Socialista y Puxa Asturies Llibre'. Na so casa se-y alcontraron pegatines con anagrama d'ETA y un manual pa fabricar esplosivos.

Por pidimientu de la defensa, declararon dellos dirixentes del movimientu sindnical asturianu qu'acreditaron la participación del acusáu en protestes de carácter llaboral, "ensin rellación con reinvindicaciones polítiques". "Ye un rapaz solidariu, prudente, non exhibicionista y parcu en pallabres --dixo ún de los testigos--. Un home bonu, como diría Antonio Machado, nel meyor sen de la pallabra".

Contador Estadistiques