Reclamen l'usu del asturianu nel DNI

Un ciudadanu reclama énte’l Delegáu del Gobiernu y la Procuradora Xeneral l'usu del asturianu y de la toponimia nel so DNI , yá que los funcionarios dixeron nun poder solucionalo.

El pasáu 8 d’abril de 2010, un ciudadanu xixonés empobinóse a la Comisaría de Xixón, onde reclamó que na dirección y llugar de ñacimientu qu’apaez nel DNI, usen la toponimia oficial del so conceyu y que’l propiu documentu apaeza n’asturianu.

Según indica’l ciudadanu implicáu, la funcionaria que lu atendió, comentó-y qu’entendía’l so casu y que taba d’alcuerdu na so reclamación, pero que nun podía poner namás que “Gijón” nel llugar de ñacimientu y “Xixon” ( ensin tilde) nel llugar de la dirección. Colo que pal ciudadanu, nenguna de les dos formes recueye’l topónimu oficial “Gijón/Xixón”, y polo tanto, incúmplese la llei.

Énte les sos protestes, “siempres con un comportamientu cortés”, a continuación pasáronlu a un despachu con un inspector de la Policia Nacional que, según indica, entamó a facer preguntes sobre les sos intenciones al facer “tales reinvidicaciones”, entrugándo-y si diba ellí “en nome de dalguna organización”.

“Indiqué-y que nun yera más qu’un simple ciudadanu y que lo único que pidía yera’l cumplimientu de la llexislación no que cinca a la toponimia oficial y la igualdá como ciudadanu del Estáu español con respeuto a los que tienen otru idioma, como llingua propia”, apunta.
 
L’inspector indicó-y que “nada podíen facer cola so reclamación”. Les opciones que-y dieron foron marchar de la comisaria indocumentáu o col DNI colos errores yá citaos y en castellán. “Asina que nun me queda otra, y actualizo’l DNI neses condiciones, pero presentando les correspondientes reclamaciones”, señala.

El ciudadanu entós dirixióse al Delegáu del Estáu n'Asturies, Antonio Trevín, y a la Procuradora Xeneral, María Antonia Fernández Felgueroso, pa que se respete la toponimia oficial del so conceyu.

Amás, el ciudadanu pidió qu'el so DNI apaeza n'asturianu, amparándose nel Títulu Prelimar y nos Artículos 3 y 14 de la Constitución española, y como reclamación, yá que cree que por ser asturianu y falante de la llingua propia d’Asturies nun tien porque ser “ciudadanu de segunda” o ensin los mesmos derechos que los demás, una y bones el DNI expédese n'otres comunidaes autónomes en versión billingüe, y xunto al castellán, en gallegu, catalán y euskera.

“Llama l’atención que la propia Procuradora Xeneral, a la que se-y pide que medie pa que se cumpla la llegalidá vixente, contestó a la protesta con un nuevu incumplientu de la toponimia llegal de Gijón/Xixón, yá que nos sos escritos de contestación apaez namás el topónimu “Gijón”, yá derogáu”, indica’l ciudadanu.