L’Academia úfrese a los partíos pa proponer un modelu d’oficialidá

L’Academia púnxose a disposición de los partíos pa contribuyir a que na fechura de los sos programes electorales, s’afite un modelu d’oficialidá arreyáu a la situación d’Asturies.

A un añu de les eleiciones autonómiques, la presidente de l’Academia pidió a los políticos xenerosidá y altor de mires pa iguar el tratamientu que na vida social y política  tien que xugar la cultura asturiana, “un tema pendiente dende la transición”, dixo Ana Cano nel Teatru Campoamor, cola sida del so discursu añal nel actu institucional de l’ALLA nel Día de les Lletres

 “Llegó’l momentu de que cada opción política ufierte a les clares a la sociedá un modelu xurídicu creyible y estable pa la llingua y reconoza lo que socialmente yá se percibe como incuestionable: que l’estatus xurídicu actual ye inoperante pa garantizar la sobrevivencia del idioma”, señaló.

La presidenta de l’ALLA dixo que nun val siguir mirando pa otru llau y dicir que n’Asturies nun hai conflitu llingüísticu, “porque ésti apruz en cuantes qu’un ciudadanu o ciudadana esixe vivir en llingua asturiana”.

Punxo como exemplu la sentencia del Xulgáu de lo Contencioso-Alministrativu que torgaba’l derechu de los funcionarios al emplegu de l’asturianu nes sos rellaciones cola Alministración, y que yera contraria al Autu del Tribunal Constitucional, qu’afitaba que tolos ciudadanos se podíen empobinar n’asturianu, al marxe de la so profesión, a los muérganos dependientes del Principáu.

“Esto ye consecuencia del curtiu conteníu de la Llei d’usu, pero, lo que ye más grave entá, de la so puesta en práutica, darréu que talamente paez que son les propies instituciones de gobiernu y los propios muérganos xurisdicionales los qu’actúen a la escontra de lo conseñao na mentada llei”, señaló.

Cano dixo que nun somos llibres pa escoyer la llingua na que queremos espresanos y que nun se pue siguir afitando que la llingua asturiana nun tien el sofitu social precisu o que nun cunta con una mayoría suficiente que la respalde pa ser oficial, “porque ehí tán los estudios, qu’afirmen que naguamos por un futuru billingüe p’Asturies”.

L’Academia esixo la oficalidá del idioma del país, “estatus al qu’enxamás renunciará”, dalgo qu’entienden que ye posible llevar alantre, “pasu ente pasu, ensin resquiebres sociales nin problemes de nengún tipu”.

Reconocimientu de la especialidá    
    
Ana Cano anunció que’l presidente del Principáu, Vicente Álvarez Areces, comprometiese cola institución a reconocer la especialidá docente del profesoráu d’asturianu de Primaria y Secundaria. Areces alcordó cola Academia iguar esti problema enantes de que fine la llexislatura, nel aconceyamientu que caltuvó cola institución va díes.
 
“Él (Areces) persabe que se trata namái de voluntá política, que la reconocencia d’esta especialidá ye la única manera d’encontar la enseñanza de la llingua neses estayes educatives y dar cumplimientu a la Llei d’Usu con seriedá y rigor”, apuntó Cano.

Creación de la Universidá Asturiana de Branu (UABRA)
    
Ana Cano anunció la creación de la Universidá Asturiana de Branu (UABRA). Una universidá asturiana y n’asturianu, que llevará alantre l’Academia de la Llingua Asturiana n’andecha cola Universidá d’Uviéu y el Conceyu de Cangas del Narcea, allugándose dende esti branu na villa de Cangas la so sede permanente.

La UABRA, onde queden encartiyaos los cursos de branu de la insitución, surde colos oxetivos de la formación na investigación en filoloxía asturiana y la formación científica n’otres árees, pero tomando l’asturianu como llingua de comunicación. Amás de l’apertura y l’espardimientu social, per ente medies d’esposiciones, conferencies, actuaciones musicales y teatrales.

Los avances

Ana Cano señaló como pasos importantes pal idioma del país nel caberu ciclu, la adautación de les titulaciones universitaries al Espaciu Européu d’Educación Superior, col inxerimientu de los estudios venceyaos a la llingua asturiana nes enseñances reglaes de la Universidá d’Uviéu.

“L’aprobación d’estes titulaciones suponen, magar lo ruina que resulta la solución de la Facultá de Filoloxía, un pasu importante, positivu, nel procesu de dignificación y normalización del idioma”, dixo la presidenta de l’Academia.

Cano faló tamién de los avances nel campu estrictamente académicu. Asina, faló del Centru de Terminoloxía n’Asturies (Termast), encargáu de la terminoloxía específica n’ambitos científicos. Tamién recordó l’asoleyamientu de nuevos númberos de la Coleición Cartafueyos normativos, y l’alcuerdu con Bubok pa la espublización en rede de delles obres de l’Academia.

La presidenta de l’ALLA punxó estos últimos avances como amueses del emplegu y adautación del idioma a les nueves teunoloxíes y del so espardimientu na rede, “dos aspeutos que tenemos que curiar con procuru porque ensin anovamientu y espardimientu talos nun ye posible la sobrevivencia de la llingua”.

Cano finó’l so discursu recordando que l’Academia nun quier un muséu pal idioma del país, “magar que fore’l muséu más queríu, nós polo que rispimos y trabayamos ye por una llingua pa la vida, por una llingua pal futuru”.