Siero presenta tres campañes de normalización llingüística

El Serviciu de Normalización de Siero presenta tres campañes, una de carteles con vocabulariu pa les escueles, otra de bolses ecolóxiques y una de carteles pa los centros de salú.

Les campañes van repartise agora gracies a subvenciones de la Conseyería de Cultura y Turismu y tán feches en collaboración con otros servicios de la Rede de Normalización Llingüística nos Conceyos. Les iniciatives busquen esparder l’usu del asturianu n’ámbitos d’interés pa la xente de Siero.

La primera, titulada ‘N’asturianu queda guapo’, consta de seis modelos de cartel con vocabulariu pa les escueles: El monte, flora y fauna; La ribera, flora y fauna; La casería; Les estaciones; El cuerpu humanu per dientro; y La vistimenta, el calzáu y los complementos.

La iniciativa son lámines en blanco y negro pa coloriar feches en collaboración colos SNL d’Aviles, mancomunidá d’El Cabu Peñes, Cangas, comarca de la Sidra, Corvera, Llaviana, Ḷḷena, Mieres y Samartín del Rei Aurelio. El dibuxante ye l’escritor de Siero Sidoro Villa Costales y l’oxetivu fundamental ye collaborar coles escueles na enseñanza del asturianu al traviés de la entrega peles escueles del conceyu.

La segunda nómase ‘Reduz, reutiliza, recicla’ consta de Bolses reutilizables, reciclables y plegables en poliéster. 400 exemplares baxo l’eslogan: '¿Tu qué faes pa cuidar el mundu? Reduz, reutiliza, recicla'.

En collaboración colos SNL de Corvera, Avilés, Samartín del Rei Aurelio, Ḷḷena y mancomunidá d’El Cabu Peñes, tien l’oxetivu fundamental de fomentar n’asturianu los valores del recicláu. La campaña va repartise a particulares y tiendes que les soliciten, ya que la tirada ye pequeña y nun pue ser una cantidá grande nel casu de les tiendes.

La última, con una tirada de 1.000 trípticos, quier difundir n’asturianu información d’interés social nos centros de salú. Baxo’l nome de ‘La salú de sentiu común ta fecha en collaboración colos servicios de Ḷḷena y la mancomunidá d’El Cabu Peñes.

Consta de Seis modelos de cartel pa colgar nos centros de salú de Siero: Contactu (llactancia); Infancia (Atendéi: hai que s’encuriosar); Anorexa y bulimia (¡Miráivos bien!); Alimentación (¿Qué vos gusta?); Tercera edá (Alienda la felicidá); Donación (Dona sangre. El sentíu solidariu).