10.000 estudiantes más d’asturianu na última década

22.466 alumnos estudien asturianu, que s’imparte nel 91% de los centros de Primaria y nel 88% de Secundaria. Nos últimos 10 años, la matriculación medró en de 9.700 estudiantes.

El Conseyeru d'Educación y Ciencia, José Luis Iglesias Riopedre, asistió güei al Actu Escolar Institucional de la XXXI Selmana de les Lletres Asturianes que se desendolcó na Casa de la Cultura de Mieres, y nel que participaron los centros educativos ganadores de los concursos de poesía, cartelismu y dibuxu.

Mientres la so intervención, José Luis Iglesias Riopedra fixo balance de la evolución qu'esperimentó la escolarización d'asturianu dende l'añu 2000 hasta l'actualidá, al cumplise'l décimu aniversariu de l'asunción de les competencies educatives, tamién nesta materia.

Un total de 22.466 alumnos estudia esti cursu 2009-10 l'asignatura de Llingua Asturiana, de los que 21.560 reciben les clases en centros de la rede pública y 906 na rede concertada. La mayoría de los escolares tán cursando esta materia na etapa de Primaria, en total 17.763 (son 17.053 na pública y 710 na concertada),  mientres que'l restu, 4.703, ta en Secundaria (son 4.507 na pública y 196 na concertada).

Nel últimu deceniu, la matriculación de Llingua Asturiana esperimentó una crecimientu de 9.763 d'estudiantes. Concretamente, aumentó en 5.000 alumnos la impartición d'esta materia en Primaria (en cifres globales pasó de 13.000 a 17.000) y aumentó en 3.700 na Secundaria (pasó de 750 a 4.500) na enseñanza pública. El porcentaxe de centros  de Primaria que la imparten pasó del 70% al 91% y en Secundaria empezó nel 14% de los institutos hasta algamar el 88% na actualidá. En cuanto al profesoráu, aumentó nel 63% el númberu de docentes que dan la materia.

Na enseñanza concertada nun s'impartía esta asignatura nel añu 2.000,  mientres qu'agora ye d'ufierta obligada en tolos centros, y tase impartiendo en doce colexos a 906 alumnos (710 en Primaria y 196 en Secundaria).

El Conseyu d’Educación dixo, qu’amás de la evolución que reflexen les estadístiques, el Principáu impulsó la enseñanza del asturianu aplicando midíes como’l desendolcu de la Llei d'Usu, garantizando la ufierta de l'asignatura en tolos centros educativos asturianos, la publicación de los currículos de l'asignatura en toles etapes educatives d'Infantil, Primaria, ESO, Bachilleratu y Adultos.
 
Tamién apuntó la esistencia de planes de formación permanente del profesoráu y xornaes d'estudiu de la Llingua Asturiana dirixíes a los docentes. Asina como planes de supervisión por parte del Serviciu de la Inspección  Educativa.

Recordó tamién la subvención a la edición de llibros de testu, “cubriendo tolos cursos de la enseñanza obligatoria, dende 1º de Primaria, llegando inclusive a la postobligatoria con llibros pal 2º de Bachilleratu, amás de manuales pal profesoráu d'Infantil y d'Adultos”.

“Los centros, profesoráu y alumnáu, disponen de distintos materiales pedagóxicos como llibros de lliteratura infantil y xuvenil, llibros de sofitu didácticu y metodolóxicu, diccionarios, página web y materiales multimedia”, dixo Riopedere, falando de l’ampliación de los fondos bibliográficos d'asturianu nes biblioteques escolares y les actividaes de sofitu a la enseñanza, como conciertos didácticos, teatru o conferencies.

El Conseyeru d'Educación y Ciencia tamién tuvo una alcordanza haza la figura  de Xosé Antonio García, poeta del fin de sieglu (1961-1997) cuya figura recuerden nesta XXXI edición de la Selmana de les Lletres Asturianes. “Recordar que ye un escritor característicu del movimientu conocíu como la Segunda Xeneración del Surdimientu, y que dende los años 60 desenvolvió una intensa actividá cultural en radiu, editoriales, revistes lliteraries y prensa”, señaló Riopedre.