Ye'l día grande de la llingua

Asturies celebra güei’l Día de les Lletres Asturianes con actos culturales per tol país, glayíos d’oficialidá n’Uviéu y un descuentu al comprar cualesquier llibru o discu n’asturianu.

La Conceyería d’Educación va entamar a les 12:00 hores nel Auditoriu de la Casa de Cultura ‘Teodoro Cuesta’ de Mieres, l’actu escolar institucional de celebración de la Selmana de les Lletres Asturianes, al qu’asistirán el Conseyeru d’Educación y Ciencia, José Luis Iglesias Riopedre, y la Directora Xeneral de Política Llingüística, Consuelo Vega Díaz. Nel actu va facese entrega de los premios del “XV Concursu de Poesía y Dibuxu” y del “VII Concursu de Cartelismu”, amás de delles actuaciones.

La nota reivindicativa de la xornada la pondrá la convocatoria de la Xunta pola Defensa de la Llingua, cola manifestación qu’entamará a les 19.30 hores na Estación del Norte d’Uviéu, baxo’l llema ‘Na reforma estatutaria, l’asturianu llingua oficial’.

El principal actu del día vien de la mano de l’Academia de la Llingua Asturiana, cola Xunta Estraordinaria nel Teatru Campoamor, onde van nomar al lleonés Nicolas Bartolomé Pérez nuevu académicu correspondiente. La gala tará presentada polos periodistes Prospero Morán y Sonia Avellaneda.

A les 20.30 hores abrirá l’actu un entamu músical de la mano del cantante de tonada Ché de Cabaños, acompañáu a la gaita por Rodrigo Joglar. Darréu, vendrá’l nomamientu de Nicolás Bartolomé Pérez como nuevu académicu correspondiente. Con esti nomamientu l’Academia refuerza la presencia de miembros lleoneses dientro de la institución, esistente dende un entamu na figura de Roberto González-Quevedo, anguaño secretariu de l’ALLA.

Depués de l’acoyida del nuevu académicu, vendrá’l discursu añal de la presidenta de l’ALLA, Ana Mª Cano, onde la institución valorará la situación de la llingua y la cultura asturiana nel últimu ciclu. Una esbilla de poemes del últimu ‘Lletres Lliterariu’ y la música d’Alfredo González pondrán-y pieslle a la xornada más importante pa les lletres del país.

Día de les lletres nos conceyos

La Comarca de la Sidra (Bimenes, Cabranes, Colunga, Nava, Sariegu y Villaviciosa) va repartir como celebración del día de les lletres les tradicionales lletres de pan, per edificios públicos, centros educativos y establecimientos hosteleros. El númberu d’elles xube esti añu a 5000, mil más que l’añu pasáu, nun formatu de presentación nuevu y acompañaes nesta ocasión d’un testu de l’autora maliaya Tuxa Villaverde.

Mientres, Samartín del Rei Aurelio va conmemorar el Día de les Lletres con un ‘bookcrossing’ de llibros n’asturianu, utilizando la web municipal como puntu d’alcuentru ente les persones que quieran sumase a la iniciativa. El Conceyu tien prevista la lliberación de más de 83 llibros n’establecimientos y llugares públicos.

En Colunga a les 10:50 hores, na escuela pública Braulio Vigón va presentase’l llibru ‘Mio ma, la pirata’ d’Iris Díaz Trancho ya ilustraciones de Gloria Caamaño. L’actu va repetise a les 12:15 hores, nel Salon d’Actos d’El Piqueru, en Llastres.
 
Na capital de país la Timba Poétika llega a la so quinta edición dedicada a la lliteratura fecha n'asturianu. Van ser 7 los poetes participantes: Miguel Allende, Laura Marcos, Pablo Texón, Sergio Gutiérrez Camblor, Xandru Fernández, Dani Tritón y Pablo X. Suárez. La cita va ser nel Bar el Zielo (Calle San Xosé, 10) a les diez de la nueche d'esti vienres 7 de mayu.
 
A les 19 hores, La Coḷḷá Propinde tará tocando en Xixón na xornada de pieslle de les XV Xornaes de Llingua y Cultura, nel salón d'actos del Atenéu de la Calzada, presentando los temes del so tercer trabayu discográficu, "A Teyavana".
 
Día de les Lletres en RTPA
 
TPA emite allanzáu, a les 00.45 hores l'actu oficial del XXXI Día de les Lletres Asturianes, organizáu pola Academia de la Llingua Asturiana
 
El programa va recoyer la intervención d'Ana María Cano González, presidenta de l'Academia de la Llingua, que va facer un análisis del usu de la llingua nel últimu añu, y del xurista lleonés Nicolas Bartolomé Pérez, que va tomar posesión del cargu d'académicu correspondiente d'esta institución.

Mientres que mañana sábadu 8 de mayu, a les 14:00 hores, la Radio del Principáu d’Asturies (RPA) va emitir ‘Xose Antonio García, vida d'un poeta’, emisión especial del programa ‘Nomes d’Asturies’, que fai un repás al mou de les vieyes radionoveles de los fechos y persones más importantes de la historia del país.
 
Día del llibru asturianu

La Conseyería de Cultura entama en collaboración coles llibreríes, tiendes de discos, editoriales, fonográfiques y distribuidores, el Día del Llibru y el Discu Asturianu, gracies a él, 57 llibreríes de 17 conceyos van facer un 10% de descuentu na venta de llibros y discos n’asturianu.

Amás, al mercar una obra nel nuesu idioma, les llibreríes van regalar el llibru ‘Xosé Antonio García, un poeta nel fin de sieglu’, publicación non venal coordinada por Ismael María González Arias y na que collaboren; Nel Amaro; Lucio Sierra Guzmán; Xuan Castañón; Antón García; Humberto Gonzali; José Fernández; Vanessa Gutiérrez; y Misael Fernández Porrón.

Tamién se va poder mercar nes llibreries del país “Poesía”, coeditado pola Conseyería de Cultura y Turismu y l'Editorial Trabe, qu’inclúi la reedición de los poemarios que Xosé Antonio García publicó en vida (‘Cuartetu de la criación’ y ‘Alcordances d’un home muertu’) a los que se xune un conxuntu d'escritos publicaos en distintes revistes o dafechu inéditos, destacando ente estos postreros el poemariu “Voz en off”. El llibru cunta cola collaboración de la filóloga Laura Rodríguez Solís y con un estudiu lliterariu del periodista y escritor José Luis Argüelles, que nos avera a distintos aspeutos de la obra de Xosé Antonio García.

L’homenaxáu
 
Xosé Antonio García (Santa Bárbara, Mieres, 1961) fixo estudios de Filoloxía Románica y Hispánica na Universidá d’Uviéu, interesándose pol afondamientu nes llingües clásiques: llatín, griegu y árabe. Desendolcó una intensa actividá cultural dende los años setenta, dirixendo programes radiofónicos o participando nel mundu editorial. Collaboró en revistes lliteraries como “El cuélebre literario” y “Mallku” (coordinaes pol tamién mierense Nel Amaro) y en “Lletres Asturianes”. Ye autor de dos llibros de poesía: “Cuartetu de la creación” (1989) y “Alcordances d’un home muertu” (1995). Xosé Antón García morrió prematuramente nel añu 1997.
 
Contemporaneu d’autores de la segunda xeneración como Antón García, Lourdes Álvarez o Berta Piñán, desarrolló’l llabor lliterariu alloñáu de xuntances, tendencies y afinidaes grupales, pa componer una de les obres poétiques más fondes, personales y enigmátiques del Surdimientu. Dexó inédita una curtia producción narrativa, tanto n’asturianu como en castellán, ye principalmente un poeta figurativu, esistencialista, que reflexona sobre la condición humana y sobre la muerte.