El Bloque por Asturies del Nalón pide’l cese de Marroquín

El Bloque esixe la dimisión del presidente de la Sociedá Rexonal de Promoción o'l so cese pol Conseyeru d'Industria, por dicir que’l pieslle de Venturo XXI débese al personal.

Víctor González Marroquín, presidente de la Sociedá Rexonal de Promoción, entidá participada mayoritariamente pol Principáu y posedora del 21% del capital social de Venturo XXI, dixo na Xunta Xeneral que nel 2005 presentóse pa la so aprobación nel conseyu d'alministración de la SRP, un informe que detallaba los puntos fuerte y débil de Venturo XXI.

Ente les fortaleces del proyeutu valorábase la so capacidá productiva, la esperiencia de los promotores, la elevada cualificación del xerente y el volume de creación d'emplegu. Ente les so debilidaes falaben de la complexa puesta en marcha de la compañía, según l'amenaza d'apaición de problemes rellacionaos col financiamientu de circulante.

Dende'l Bloque por Asturies del Nalón entruguen cómo ye posible “qu’unos promotores con esperiencia, qu'un xerente con una elevada cualificación, teniendo en cuenta la enorme cantidá de fondos públicos inyectaos nesta empresa, según la inxente cantidá de contratos públicos que-yos fueron asignaos, dexaren que la empresa llegara a esta situación”.

Pa la organización, l'intentu de facer recayer sobre los trabayadores la responsabilidá del colapsu d'esta empresa resulta patéticu, “inclusive irrisorio si nun fora poles graves consecuencies que para éstos y pal texíu empresarial del nuesu conceyu supon el posible zarru de Venturo XXI”.

 “El cinismu políticu qu'escuenden les sos declaraciones ye d'una magnitú poques vegaes reparaes nun  responsable políticu, supuestamente socialista”, diz la organización nacionalista, que señala que la plantiya de la empresa mientres el primer añu consiguió que funcionara a plena capacidá.

Pal Bloque, Graciano Torres ye l’auténticu responsable de que “persones como estes” ocupen cargos fundamentales pa la reindustrialización del Nalón y esixen qu’utilice  tolos recursos posibles pa llograr un futuru pa Venturo XXI, “torgando d'esta manera que les grandes inversiones efeutuaes hasta'l momentu foren baldíes”.