Berta Piñán y los maestros centren la última Xunta d’Escolinos

Berta Piñán foi, xuntu a Xosé Antonio García, l’autora a la que más acudieron los neños de Primaria d’Avilés pa facer les sos representaciones dientro de la última Xunta d’Escolinos.

L’actu entamó namás salir la presentadora y saludar a los más de 600 neños qu’enllenaron l’Auditoriu de la Casa de Cultura d’Avilés, un “Bonos díes” de l’actriz que facía d’anfitriona foi retrucáu al unísono nel mesmu idioma pola mayoría d’escolinos.

Después, xubió a l’escenariu l’alcaldesa socialista d’Avilés, Pilar Varela, que quixo reconocer el trabayu de los maestros d’asturianu pa recuperar la nuestra llingua, al empar que’l de la responsable de la Estaya de la Llingua, Montse Machicado, proponiendo actividaes pa facer.

Varela, que faló en castellán, recordó la recuperación pol Conceyu d’un orixinal del Fueru d’Avilés, “que ta escritu n’asturianu”, y señaló como “mui importante” que Miguel Solís Santos, autor del cartel de les Xuntes, falará n’asturianu al lleer el pregón de les fiestes del Bollu. Dalgo mui importante que, sicasí, nun fixo l’Alcaldesa, pronunciando delantre de los neños les úniques pallabres que se sintieron en castellán en tol actu.

Depués de les pallabres institucinales volvió a salir la presentadora, qu’entruga a los que tán más arriba si ven bien, a lo qu’un neñu glaya “perbien”. Darréu entamen les representaciones de los nueve colexos (CRA Cabu Peñes de Gozón; El Vallín, Manuel Álvarez Iglesias, CRA Castrillón-Illás y Castillo de Gauzón de Castrillón; Apolinar, Palacio Valdés, La Carriona y Llaranes d'Aviles).

Los escolinos falen n’asturianu d’un xeitu normal y ensin mayor problema, mesmamente siéntese falar el nuesu idioma con acentos d’Europa del Este y de Llatinoamérica.

Los poemes de ‘Arroz, agua y maíz’, llibru de Berta Piñán, son recitaos polos colexos d’El Vallín, Llaranes y Salinas, estos últimos cantando. Mientres que’l colexu Apolinar tamién recurrió a l’autora canguesa pa representar ‘L’estranxeru’, una obra de teatru sobre la tolerancia haza lo diferentes.

Xuan Bello foi l’escoyíu polos neños del CRA Cabu Peñes, Manuel Asur polos de La Carriona, Xosé Benito Álvarez-Buylla polos del Palacio Valdés. Mientres, los neños del Castillo de Gauzón representaron un programa de radio sobre la época de Xosé Antonio García, con publicidá y música de Spanta la Xente

El programa nómase ‘Asturies na so cultura y na so llingua’, igual que’l primeru de la historia de la radio n’asturianu que fixeron los socios de Conceyu Bable-Xixón y nel que participaba Manfer de la Llera. Los neños falen de que baxa’l paru, hai menos ñacimientos y menos llabradores, mientres que conceyos como Bimenes o Teberga declaren la oficialidá “porque la presencia del asturianu na sociedá ye más importante, sigamos lluchando por ello”.

Piesllen la segunda xornada de les Xuntes d’Escolinos los neños del CRA Illas-Castrillón, con un homenaxe a Xosé Antonio García, faciendo un neñu del autor mierense, y la representación del cuentu tradicional ‘La tía Miseria’. Depués, los siete maestros de los nueve colexos, cinco muyeres y nueve homes, xuben al escenariu a coyer un regalu. Mientres, los escolinos glayen el nome del so profesor.