Cultura diz que los pecios del Eo nun se puen llevar pa Galicia

La Conseyería de Cultura incluyó na Carta Arqueolóxica de Castropol un xacimientu subacuáticu, “lo que fai inviable que puean estrayese los restos esistentes pa llevalos a Galicia”.

Los restos foron alcontraos en 2007 na ensenada de Llan, ente la sablera de Arnao y el cabu de la Punta da Cruz (en Castropol). Diversos llabores d'investigación detallaron los materiales qu'integren el xacimientu subacuáticu, estableciendo la hipótesis de que los barcos a los que corresponderíen los restos foren dos fragates españoles fundíes por navíos ingleses el 27 de setiembre de 1719.

La inclusión na Carta Arqueolóxica d'esti xacimientu implica que ye d'aplicación, a tolos efeutos, la llexislación de Patrimoniu Cultural d'Asturies, Asina, nun van poder estrayer los restos materiales esistentes na fastera asturiana de la ría del Eo pa llevalos a Galicia.

Amás, según indiquen dende Cultura, va tratase’l xacimientu según los criterios qu'a nivel estatal tán establecíos nel aprobáu va poco Plan Nacional de Protección del Patrimoniu Arqueolóxicu Subacuáticu. Esti Plan establez que la estracción de pieces ye'l recursu final al que se debe recurrir, “namás cuando se compruebe necesaria pa garantizar la so preservación”.