El desempléu baxó en 884 persones n'abril

El númberu de paraos baxó en 884 persones n'abril, sobre'l mes anterior, lo que supón un descensu del 1,06 por cientu, y asitió el númberu de paraos n'Asturies en 82.722.

Sicasí, en comparanza col mesmu mes del añu anterior, hubo una subida del 12,14 por cientu, al contabilizase 8.952 paraos más, colo que la cifra total de paraos na rexón sigue tando penriba de los 82.000 (en concreto, 82.722).

A nivel estatal, el númberu de paraos rexistraos nes oficines de los servicios públicos d'emplegu (antiguu Inem) baxó en 24.188 persones n'abril, un 0,6 por cientu sobre marzu, colo que'l volume total de paraos asitióse en 4.142.425 persones.
  
Esti descensu fraya l'enclín alcista del paru al ser la primer cayida que rexistra'l desemplegu nos últimos nueve meses. Coles mesmes, la reducción de paraos d'abril contrasta cola subida de 39.478 paraos que s'esperimentó n'igual mes del 2009.
 
Sectores
  
De los 82.722 paraos asturianos contabilizaos al acabar el pasáu mes, 53.069 pertenecen al sector servicios, siguíu de la construcción (13.097), la industria (9.162), el colectivu sin emplegu anterior (6.488), y l'agricultura, con 906 paraos.
 
Sexu, edá y estranxeros

El paru n'Asturies afecta a 38.826 homes y a 44.896 muyeres. Esti desemplegu afecta a 9.408 menores de 25 años, 5.338 homes y 4.070 muyeres.
  
No referente a la población estranxera, al acabar marzu había n'Asturies 5.751 paraos, d'ellos, la mayoría vienen de países estracomunitarios (3.672), mientres que los 2.079 restantes son de la Unión Europea.
 
Contratos
 
Pese al descensu del paru, n'abril firmáronse n'Asturies 863 contratos menos qu'en marzu, hasta contabilizase un total de 21.364 robles (n'España esti datu baxó un 9,32%).
  
En comparanza col mesmu mes del 2009, prodúxose un ascensu del 11,33 por cientu (frente a la subida del 4,57 por cientu de la media nacional), con 2.174 contratos menos na rexón.
  
De los 21.364 contratos firmaos n'abril nel Principáu, más del 90 por cientu fueron temporales (19.455), y el 10 por cientu restante, indefiníos (1.909).