Entama la XXXI Selmana de les Lletres Asturianes

|

Mercedes Álvarez y l'Alcalde de Mieres presentaron la edición conmemorativa 'Xosé Antonio García, un poeta nel fin de sieglu' y el llibru 'Poesía', qu'axunta trabayos del autor mierense.

La Conseyera de Cultura y Turismu, Mercedes Álvarez González, presidió esti mediudía la inauguración de la XXXI Selmana de les Lletres Asturianes, que ta dedicada al poeta mierense Xosé Antonio García (1961-1997). Nesta apertura oficial celebrada na Casa la Cultura de Mieres, la Conseyera tuvo acompañada pol Alcalde de Mieres, Luis María García, y pola Direutora Xeneral de Política Llingüística, Consuelo Vega Díaz, ente otres autoridaes.

La XXI Selmana de les Lletres Asturianes ta entamada pol Principáu en collaboración col Conceyu de Mieres, ya inclúi la celebración de dellos actos de calter institucional, la organización d'actividaes escolares o la publicación de dos importantes obres preparaes espresamente pa la ocasión y que fueron presentaes nel intre d'esti actu inaugural.

La edición conmemorativa ‘Xosé Antonio García, un poeta nel fin de sieglu’, publicación non venal coordinada por Ismael María González Arias y na que collaboren; Nel Amaro; Lucio Sierra Guzmán; Xuan Castañón; Antón García; Humberto Gonzali; José Fernández; Vanessa Gutiérrez; y Misael Fernández Porrón. Esti llibru, ilustráu con abondosu material gráfico, va regalase'l vienres 7 de mayu, Día del Llibru Asturianu, al mercar llibros n'asturianu. Nesta edición participen 57 librerías de 17 conceyos asturianos.

Mientres que’l llibru “Poesía”, coeditado pola Conseyería de Cultura y Turismu y l'Editorial Trabe, inclúi la reedición de los poemarios que Xosé Antonio García publicó en vida (‘Cuartetu de la criación’ y ‘Alcordances d’un home muertu’) a los que se xune un conxuntu d'escritos publicaos en distintes revistes o dafechu inéditos, destacando ente estos postreros el poemariu “Voz en off”. El llibru cunta cola collaboración de la filóloga Laura Rodríguez Solís y con un estudiu lliterariu del periodista y escritor José Luis Argüelles, que nos avera a distintos aspeutos de la obra de Xosé Antonio García.

Tres la presentación d'estos llibros, fíxose la inauguración de la esposición ‘Xosé Antonio García, un poeta nel fin de sieglu’, qu’ufierta una imaxe completa de la personalidá ya intereses del escritor al traviés del testimoniu de dellos compañeros de xeneración.

L'oxetivu final de la Selmana de les Lletres Asturianes ye la recuperación y divulgación d'un autor o autora, xuniendo'l so nome a la nómina de los clásicos de la lliteratura asturiana. Xosé Antonio García (1961-1997), l’autor homenaxeáu, desenvolvió una intensa actividá cultural dende los años setenta del pasáu sieglu, collaborando de manera activa en revistes lliteraries y en prensa, dirixiendo programes radiofónicos o participando nel mundu editorial. Publicó dos llibros de poesía –‘Cuartetu de la criación’ (Casa de Cultura Teodoro Cuesta, 1989) y ‘Alcordances d’un home muertu’ (Editora del Norte, 1995), amás de dexar inédita parte de la so obra, qu'agora se recupera.

 

Contador Estadistiques