XEGA pide l'abertura del mercáu llaboral a los transexuales

Xega pide nel 1 de Mayu, l'abertura del  mercáu llaboral a los transexuales, "ún de los coleutivos con mayor riesgu d'esclusión social según la Comisión Europea", argumentaron.

Les persones transexuales tienen importantes dificultaes nel so procesu d'inserción llaboral pola falta de formación, el desconocimientu de ferramientes pa la busca d'emplegu, el mieu escénicu, o la esistencia d'estereotipos negativos nel imaxinariu colectivu sobre les persones transexuales. Amás, surde la incongruencia ente l'aspectu físicu y los datos del DNI, que requieren de dos años de tratamientu pa poder modificalos, y qu'añade dificultaes a la hora de la contratación.
  
P'arreglar estes dificultaes, XEGA ofrezse al empresariáu que desee información pa superar los prexuicios que suponen una torga pa la contratación de persones transexuales. De la mesma manera proponen trabayar con esti colectivu pa superar los problemes derivaos de la discriminación a la que ta espuestu. Coles mesmes, la Federación trabaya colos sindicatos UXT y CC.OO pa dar amparu a transexuales y tratar los casos de discriminación.