Aprobada una iniciativa p'actualizar el diagnósticu del Arte Asturianu

PSOE y PP unieron los sos votos p'aprobar una proposición non de llei de los populares qu'encamienta a actualizar el diagnósticu de los monumentos del Aret Asturianu.

Según la iniciativa aprobada, el sistema tien de contar con un conxuntu de prioridaes, con establecimientu de plazos y compromisos económicos pa "amenorgar los deterioros que nesti momentu se constaten a güeyu", amás de midíes ordinaries de caltenimientu, protección y defensa de los monumentos y los sos entornos.
  
IU-BA-Verdes, pela so parte, astúvose na votación. Consideraron "asombroso" que nel testu nun apaeza per nenguna parte la recuperación del Plan del Prerrománicu de Nanclares y Capitel, depués de que'l PP anunciare "de gaita y tambor" que diba pidir la recuperación del citáu plan. A xuiciu d'IU-BA-Verdes, detrás d'esta decisión ta l'alcalde d'Uviéu, Gabino de Lorenzo, porque'l citáu plan refugaba la llosa de Santuyano y contemplaba la necesidá d'espropiar l'edificiu llenderu a Foncalada, nel que'l PP concedió la llicencia d'abertura del discu pub.
 
"Ustedes lo que quieren ye soterrar el Plan de Fernando Nanclares y Antón Capitel y dar por escelente'l Conveniu robláu'l pasáu mes de marzu ente'l Ministeriu de Cultura, la Conseyería de Cultura, la Ilesia y los conceyos implicaos", señaló'l diputáu d'IU-BA-Verdes Roberto Colunga.
  
Pela so parte el diputáu del PSOE, Alfonso Rey, dixo que les xustificaciones del PP pa defender la iniciativa son "falses" y "incorrectes". Dende l'añu 99, según Alfonso Rey, el Principáu apostó pol Prerrománicu, cuntando col apoyu del Estáu tres la etapa del Gobiernu de José María Aznar.
    
Los más de 700.000 euros invertíos per parte de la Conseyería de Cultura no que va de lexislatura pa monumentos del Arte Asturianu son prueba, según el diputáu socialista, del esfuerzu que se ta realizando nesti asuntu. Asina, dixo qu'al PP "namás-y queda'l recursu a la demagoxa". Con too y con eso, el PSOE votó favorablemente a la iniciativa.