El primer trimestre del añu acabó n'Asturies con un paru del 16,56%

El primer trimestre del añu acabó n'Asturies con una tasa de paru del 16,56 por cientu y con 80.100 paraos, según datos del INE publicaos esti vienres y recoyíos por Europa Press.

D'esta manera, les oficines de desemplegu rexistraron a 11.500 nueves persones paraes n'Asturies a lo llargo d'últimu trimestre, lo que supunxo un aumentu del 16,80 por cientu sobre'l trimestre anterior.

Pela so parte, el conxuntu d'España acabó'l primer trimestre del añu con una tasa de paru del 20,05 por cientu, la más alta dende últimos de 1997, y con un nuevu récor de paraos. En total, 4.612.700 persones taben sin emplegu al acabar marzu, 286.200 más qu'al acabar el 2009 (+6,6%).
  
No que se refier a la subida del paru nel primer trimestre del añu en relación al periodu anterior, el d'Asturies (16,8%) ye'l tercer más eleváu del Estáu, per detrás de Galicia (19,15%) y Navarra (17,26%).
 
L'aumentu de paraos nel primer trimestre del añu n'Asturies acompañóse d'un descensu del númberu d'ocupaos, en concretu 9.200 menos, lo que supón una cayida del 2,2 por cientu (nel conxuntu del país esti datu baxó un 1,35%), asitiándose la cifra global en 237.100 (18,4 millones n'España).
  
En comparanza colos trés primeros meses del 2009, la ocupación cayó un 5,8 por cientu nel pais (un 3,65% la media estatal), lo que significa una perda de 25.100 trabayadores nun añu (casi 700.000 en toa España).
 
Pela so parte, la población activa quedó a últimos de marzu n'Asturies en 483.600 persones, esto ye, una subida del 0,47 por cientu (la metá que n'España, onde'l repique foi del 0,15%).  Pese a esti lixeru aumentu, nel últimu añu rexistróse un descensu del 0,73 por cientu na rexón, lo que se traduz en 6.400 persones (bien penriba del conxuntu del país, onde'l descensu foi del 0,41%).
 
De los cerca de 80.100 paraos asturianos contabilizaos nel primer trimestre del añu, 42.300 yeren homes y 37.800 muyeres. Ente los primeros, la tasa de paru yera del 16,15 por cientu, y ente les segundes, del 17,04 por cientu. No que se refier a la población ocupada, 219.400 de los 403.500 trabayadores son homes, mientres, 184.100 son muyeres.