L'Institutu de la Muyer presenta un primer borrador de la Llei d’Igualdá

L'Institutu Asturianu de la Muyer presentó al Conseyu de la Muyer un primer borrador de la Llei pa la Igualdá de Muyeres y Homes y la Erradicación de la Violencia de Xéneru.

La Conseyera de Presidencia, Xusticia ya Igualdá, María José Ramos, presidió ayeri la sesión estraordinaria del Conseyu Asturianu de la Muyer na que, al par de la Conseyera de Bienestar Social y Vivienda, Noemí Martín, y la Direutora del Institutu Asturianu de la Muyer, María Fernández Campomanes, presentó un primer borrador de la Llei d’Igualdá.
 
Mientres la xunta, les distintes representantes de les asociaciones de muyeres, sindicatos y partíos políticos integrantes del Conseyu presentaron les sos propuestes y aportaciones al testu de partida.
 
Trátase del primer pasu na tramitación d'esta nueva normativa que, pasando pol Conseyu Asturianu de la Muyer, va siguir el so procesu coles mires de, este mesmu añu y  llogrando'l vistu bonu del Conseyu de Gobiernu, ser treslladáu a la Xunta Xeneral pa la so aprobación definitiva.
 
Los principales oxetivos del testu son afitar los derechos establecíos la Llei Integral contra la Violencia de Xéneru y la Llei pa la Igualdá Efeutiva, consolidar les meyores en materia d'igualdá algamaos n'Asturies ya impulsar les polítiques públiques pa la igualdá, reforzando'l compromisu de tolos departamentos del Principáu nesta materia.
 
Una de les principales novedaes d'esta Llei al respeutive de les yá esistentes n'otres Comunidaes ye que fala de dos materies: la igualdá ente homes y muyeres y la violencia de xéneru, yá que l’alministración entiende que la violencia de xéneru ye la manifestación más brutal de la desigualdá.