UNA fai un llamáu a la participación nel 1 de mayu de Xixón

Baxo’l lema “Que guapo ye querese”, UNA quier rescamplar el tratu de favor de los gobiernos a los grandes porgüeyos financieros ya industriales y la marxinación de les trabayadores.

Unidá Nacionalista Asturiana va asistir a la Convocatoria del primeru de Mayu fecha pola CSI, SUATEA, CXT y SF na plaza l'Humedal de Xixón a les 12 hores. La organización va tar presente na manifestación, según indiquen, pa sofitar a los sindicatos que tienen una clara posición de defensa de los trabayadores.
 
Baxo’l lema ‘Que guapo ye querese’, UNA quier denunciar les midíes del gobiernu central y autonómicu, “col preste y sofitu de los sindicatos mayoritarios, que sirvieron pa iguar los grandes problemes de les entidaes financieres ya industriales, ensin dar respuesta real al gran problema actual de la crisis, que ye'l desemplegu”.
 
Dende UNA conviden a tolos trabayadores a participar nesti primeru de Mayu pa dar respuesta a unes midíes que los gobiernos central y autonómicu quieren vender como sociales, “cuando lo único que vienden ye a los trabayadores, que ven como gran parte del déficit público de la nuestra economía ye por mor d’unes midíes que favorecieron a bancos, constructores, empreses automovilístiques y grandes corporaciones y que quieren qu'esi furacu seya pagu ente toos arrenunciando a derechos llaborales, aumentando impuestos inxustos como l’IVA y xubiendo la edá de xubilación a los 67 años.
 
La organización diz que nun se pue dexar ensin contestación la propaganda d'unos gobiernos, que quieren xustificar con una pequeña meyora del paru, “más empobinada a evitar una esplosión social qu'a garantizar una renta a toa persona que pueda y quiera trabayar, tolos recortes sociales que se tán poniendo nes distintes meses de negociación, pa compensar unos gastos que namás marxinalmente foron parar a nós y mayoritariamente foron a les grandes corporaciones industriales y financieres”.
 
“Que guapo ye querese ye la respuesta d'UNA a unes midíes gubernamentales estatales y autonómiques que namás busquen la precarización del trabayu, la desproteición social y dende esta perspectiva podemos glayar colos sindicatos convocantes que “Asturies sálvase lluchando”, apunten pa finar.