Mil asturianos menos en 2009

Asturies rexistró un descensu de 1.180 habitantes nel 2009, quedando l'últimu padrón del 1 de xineru del 2010 en 1.084.109 habitantes, según los datos publicaos güei pol INE.

Trátase d'un descensu, sobre'l padrón del añu anterior, d'una décima. D'otra manera, el númberu d'estranxeros instalaos n'Asturies, incluyíos na cifra anterior, aumentó un 4,3%, con 2.030 más qu'hai un añu, siendo un total de 49.149 persones.

El total de residentes nel Estáu a 1 de xineru del 2010 ye de 46.951.532 habitantes, lo que supón un aumentu del 0,4% (205.725 persones) al respeuto de los datos de 1 de xineru del 2009. D'esti total, 41.242.592 tienen nacionalidá española. Pela so parte, 5.708.940 son estranxeros, lo que representa'l 12,2% del total d'inscritos.
  
Mientres l'añu 2009 el númberu d'españoles empadronaos esperimentó un aumentu netu de 145.456 persones (0,4%), mientres que'l númberu d'estranxeros creció en 60.269 (1,1%). Ente éstos últimos, los pertenecientes a la UE-27 crecen en 73.289 (hasta un total de 2.346.515 persones), mientres que los non comunitarios baxaron en 13.020 persones (quedando en 3.362.425).
  
En total, de los casi 47 millones de persones que viven n'España, 49,4 por cientu son homes y el 50,6 por cientu, muyeres, porcentaxe que varía cuando se tien en cuenta la nacionalidá, puesto qu'ente los españoles hai más ciudadanes (51,0 por cientu) qu'ente los estranxeros, onde suponen el 47,5 por cientu.
  
Atendiendo a la edá de los habitantes empadronaos, el 15,6 por cientu de la población tien menos de 16 años; el 42,6 por cientu tien ente 16 y 44 años y el 41,8 por cientu tien 45 ó más años.
  
Nel casu de los estranxeros, la población d'ente 16 y 44 años supón el 62 por cientu de les persones inscrites, mientres que menos del cuarenta por cientu d'españoles tán nesti tramu d'edá. Amás, el 18,5 por cientu de los nacionales superen yá los 65 años, porcentaxe que nos foriatos nun llega al nueve por cientu.
  
Por comunidaes autónomes, los datos del INE reflexen que mientres Madrid (con 58.567 persones más), Andalucía (50.920) y Cataluña (29.461) aumentaron la so población l'añu pasáu, Castiella y Lleón, Asturies y Aragón perdieron caúna 7.806, 1.180 y 54 habitantes.
  
Sicasí, les mayores subíes de población en términos relativos produxéronse nes ciudaes autónomes de Melilla (3,5 por cientu) y Ceuta (2,4 por cientu), asina como en Rexón de Murcia, Comunidá de Madrid, Comunidá Foral de Navarra y Isles Baleares (toes elles con un 0,9 por cientu). Colos parámetros, la mayor reducción de población diose en Castiella y Lleón (-0,3 por cientu).