El Bloque diz a PP y PSOE que tomen exemplu d’El Vascu

El Bloque felicita a IU y Los Verdes pol resultáu de la denuncia sobre'l Palaciu de Xusticia. Amás, piden a PSOE y PP xacíu sobre la incineradora, “sinón quieren volver quedar n'evidencia”.

Énte l'anulación, pol Conseyu de Gobiernu, del conveniu robláu en xunu de 2009 ente'l Principáu y Xovellanos XXI, pa la construcción del Palaciu de Xusticia d'Uviéu, na parcela de “El Vascu”, el Bloque por Asturies felicita a los sos compañeros de coalición, Izquierda Unida y Los Verdes “y a toes aquelles organizaciones y vecinos que fueron consecuentes na denuncia pola falta de llegalidá na contratación del Palaciu de Xusticia”.

La organización diz reconocer que la centralización de los órganos de xusticia ye necesaria y beneficiosa, “pero tien de facese en too momentu acordies cola normativa vixente, respetando'l mediu ambiente y optimizando los recursos por que nun seyan los ciudadanos los que tengan de pagar más de los necesario por una mala planificación y xestión”.

Coles mesmes, “y teniendo en cuenta la resolución de la Comisión europea nesti tema, o nel del Musel por casu”, el Bloque por Asturies pide al PSOE y al PP reflexón y xacíu con al respeutive de la incineradora de Serín, “pa que nun tengan que pasar una vegada más pola vergüenza de que se vea públicamente qu'anteponen los sos negocios al bienestar de la sociedá, violando too tipu de lleis ya hipotecando el futuru d’Asturies y los sos habitantes.