Soliciten camudar el trazáu de l'autovía Avilés-Llanera

La Foz del Pielgu estudia entamar acciones llegales col envís de modificar el trazáu de l’autovía Avilés-Llanera, “yá que perxudica notablemente al  patrimoniu cultural de Corvera”.

L’asociación considera que los planes del Principáu perxudiquen al conceyu nel terrén medioambiental y cultural y señalen qu’esisten otres alternatives. Afirmen que ye muncho mayor el prexuiciu, "atraviesa'l conceyu y dixebralu pela metá", y consideren “más que discutible” qu'esta Autovía puea tener interés xeneral real.

L'asociación diz que ye pergrave’l pasu de l’autovía pol núcleu de Molleda, “pola contaminación tantu nel planu acústicu como visual”. Califiquen como “casu sangrante” el de Ramón Amor, vecín de Molleda y que lleva más d'ocho años de la so vida rehabilitando distintos elementos etnográficos, como una panera del añu 1826 con talles decorativos de forma tradicional, un molín d'agua y una casa del SXIX.

“Tuvo ayudes del mesmu Gobiernu qu'agora quier pasar una autovía per riba de les edificaciones, ye pura demagoxa", sorrayen dende la Foz del Pielgu.