Corquiéu destaca'l "ésitu" de la presentación del so nuevu discu

El grupu Corquiéu destacó'l "ésitu" de la presentación del so últimu discu 'Suaña', que tuvo llugar nel teatru Filarmónica d'Uviéu'l pasáu sábadu, 24 d'abril.

La presentación d'esti trabayu, que vien poner el ramu a cinco años de trabayu por parte del grupu, siguióla un teatru llenu d'incondicionales del grupu qu'esperaben esti momentu dende hai años.
  
Nel conciertu, el grupu presentó tolos temes nuevos intercalándolos con vieyos, que'l públicu conocía bien. Amás, el grupu guardaba delles sorpreses, que foi dosificando poco a poco. Entre elles, les collaboraciones, de los músicos que participen nel discu, un duo de Gema García y Alfredo González acompañaos con pianu solamente, y la participación de la Banda de Gaites El Llacín, nel últimu tema del conciertu. Nel pieslle, el públicu zarró l'actu en pie con dellos minutos d'aplausos.