La mocedá de Xixón “saca la llingua”

Cerca de 600 mozos y moces de Xixón van participar nuna xornada lúdico-pedagóxica na que s'intenta averar l’asturianu a la mocedá al traviés de talleres y un concursu de caraoque.
La Oficina Municipal de la Llingua organiza, con gran ésitu, los Alcuentros de la Mocedá cola Llingua, "Saca la Llingua", dende hai siete años, coincidiendo cola Selmana de les Lletres Asturianes.
La xornada va tener llugar nel Muséu del Pueblu d’Asturies con actividaes como xuegos y deportes tradicionales como los bolos, la llave, los zancos, la rana, el tiru cuerda, el tiru al palu.
Tamién va haber una "yincana biolóxica", onde los neños van tener que trabayar  a comuña pa dir preparando les distintes  pruebes qu'enllenen los espacios del Pueblu d'Asturies y que tienen que ver cola diversidá biolóxica y la flora y la fauna asturianes, coincidiendo col añu internacional de la diversidá biolóxica.
Amás a lo llargo la mañana los alumnos y alumnes van participar en dellos talleres: De cocina intelixente, de cómic con ruma Barbero, de doblaxe con Berto Rodríguez, de cuentos con Dolfo Camilo Díaz, de rap col grupu K- Nalón y de baille col grupu La Señardá.
Otra manera esti añu va ser la mocedá la encargada de pesllar los alcuentros coles sos voces y cantares. Al traviés d'un concursu de caraoque, los institutos van participar cantado caún un cantar de distintos grupos asturianos, ente ellos Dixebra, Nuberu, Skama la Rede, Los Berrones, Xentiquina, Carlos Rubiera, etc
Les actividades entamen a les 9.30 y el caraoque ta previsto qu'entame a les 12.15. Participen esti añu 545 mozos de los institutos Universidá Llaboral, Emilio Alarcos, Calderón de la Barca, Mata-Xove, Doña Ximena, Montevil, Rosario Acuña, Padre Feijoo, Roces, Fernández Vallín, Colexu San Lorenzo, Númberu 1 y Xovellanos.