Les VII Xuntes d'Escolinos homenaxarán a Xosé A. García

El Conceyal de Cultura, Román Álvarez, presentó esta mañana'l cartel de les VII Xuntes d'Escolinos d'Avilés y Comarca, qu'homenaxarán al escritor mierense Xosé Antonio García.

Nel actu de presentación del cartel, obra del escritor ya illustrador avilesín, Miguel Solís Santos, asistieron el Conceyal, el propiu autor del cartel y la responsable de la Estaya de la Llingua d'Avilés, Montse Machicado.
 
Nes Xuntes d'Escolinos, que van celebrase los díes 4 y 5 de mayu nel Auditoriu de la Casa de Cultura d'Avilés, van participar más de 700 escolinos, "500 de Primaria y unos 250 de Secundaria, yá que nesta étapa la escolarización n'asturianu tien munchos más problemes", apuntó la responsable del serviciu de normalización municipal.
 
Esti añu la Xunta va tar dedicada al autor homenaxeáu na Selmana de les Lletres, Xosé Antonio García, anque los neños van trabayar con otros autores de la segunda xeneración del Surdimientu, como Berta Piñán o Lurdes Álvarez. "La poesia d'esti autor ye mui complexa pa los neños, por eso abrimos l'actividá a tola segunda xeneración, anque con too, ye sorprendente lo que los neños lleguen a facer y trabayar", señaló Montse Machicado.
 
Les Xuntes d'Escolinos van celebrase en dos díes, el primeru, el 4 de mayu, entamará a les doce de la mañana y participarán cuatro institutos de la comarca d'Avilés (Carreño Miranda y La Magdalena d'Avilés; Isla de Deva y CRA Castrillón-Illás de Piedrasblancas). Esti día actuará'l grupu Xuntanza, con una amuesa de folcore de la zona de Mieres, onde ñació l'autor homenaxeáu.
 
Al día siguiente, el 5 de mayu, a les 10.30 nueve colexos (CRA Cabu Peñes de Gozón; El Vallín, Manuel Álvarez Iglesias, CRA Castrillón-Illás y Castillo de Gauzón de Castrillón; Apolinar, Palacio Valdés, La Carriona y Llaranes d'Aviles) van participar nos actos. Según Machicado tolos colexos ya institutos tienen les puertes abiertes a participar y recordó que l'asistencia a les xornaes tien muncho que ver col propiu interés del maestru d'asturianu.
 
Los actos de les Xuntes d'Escolinos nun finen ehí, yá que'l día 10 va entregase'l premiu del VI Concursu de Mascotines, de la que resultó ganadora 'Pioyosu' de Lorena Mª Espiña López, del CP Castillo de Gauzón, amás de los premios a los dos finalistes.
 
Una esposición nel Palaciu de Valdecarzana, ente'l 10 y el 14 de mayu, de les mascotines y de les illustraciones del cuentu 'Arroz, agua y maíz' de Berta Piñán, ganadora del Premiu María Xosefa Canellada 2008, completarán les actividaes coles que la Estaya de la Llingua quier averar la gran fiesta de la llingua del país a los escolinos de la comarca d'Avilés.
 
El cartel de les Xuntes
 
Esti añu, y como vien pasando dende la primer edición d'esta actividá, fai siete años, el cartel ye obra del escritor avilesín Miguel Solís Santos, autor de la primer novela curtia del Surdimientu, 'Les llamuergues doraes'.
 
Solís dixo que cada añu yera más difícil facer el cartel y qu'esti añu quixo representar el Surdimientu al traviés d'un árbol, "un árbol cuyos raigaños parten del campu, un campu verde con caseries y vaques, la lliteratura costumista anterior al Surdimientu".
 
Del tueru del árbol, que representa a Conceyu Bable, "enraigonáu col campu, la tradición", surden les rames, "que toquen tolos palos, como la lliteratura asturiana d'anguaño; vemos una manifestación, que representa la transición, l'Asturies urbana con industries, un astronauta que amuesa'l futuru, y homes medievales y mitolóxicos, que ye la lliteratura infantil".