La SGAE mantuvo estables los sos ingresos n'Asturies en 2009

Los ingresos de la SGAE n'Asturies caltuviéronse estables en 2009. Anque les cifres aumentaron nun 10,15%  gracies a los derechos xeneraos pola TPA, 671.700 polos años 2007 y 2008.

Asina lo esplicaron güei en rueda de prensa'l direutor d'Innovación, Calidá y Proteición de Datos de la entidá, José Miguel Moneo, y el director de la SGAE- Noroeste, Javier Vidal, qu'apuntó que restando los ingresos xeneraos por TPA, "el balance n'Asturies ofrez un resultáu equilibráu", pese a la situación de crisis y a otros factores como'l zarru temporal del Teatru Xovellanos de Xixón.

Coles mesmes, Vidal aseguró que nel 2009 el númberu d'afiliaos elevóse nun 8,1 por cientu respecto al exerciciu anterior, algamando asina los 1.372 socios del total nacional que rexistra 96.955 afiliaos. Del total de la cifra recoyida n'Asturies, 1.127 son compositores, 103 autores dramáticos, 57 pertenecientes al ámbitu audiovisual y 85 editores.
  
Amás, la SGAE xestionó 7,24 millones d'euros, que según esplicó'l direutor de la entidá pa la zona noroeste, destinóse al repartu ente el autores y los 'derechohabientes'.
  
"El sector priváu recuperó nel 2009 el protagonismu que nun tuviere n'años anteriores", siguió Javier Vidal, qu'achacó esta subida a la puxanza de los pequeños conciertos en perxuiciu de los grandes festivales, que requieren una gran inversión y un riesgu considerable que les entidaes privaes nun tán dispuestes a asumir na mayoría de los casos.
  
Tamién esperimentó una subida de la música un vivo y les artes escéniques. Concretamente un 40,32 por cientu que ta estrechamente rellacionáu col pagu d'atrasos per parte de delles entidaes. Nestos ámbitos, Vidal destacó l'espectáculu 'Hoy no me puedo levantar', celebráu nel Teatru de La Llaboral, por ser el que más derechos d'autor xeneró nel 2009. Síguen-y 'La del manojo de rosas'. '¡Una noche de zarzuela!', 'Katiuska', y 'Marina'.
  
No referente a la música en vivo, ye'l festival Aquasella'l que lidera la llista, al empar de los espectáculos de Miguel Bosé, el Festival Juventú, El Canto del Loco y el Festival Derrame Rock. La música clásica recuperó nel pasáu exerciciu la reducción de los últimos años, con una subida del 44,58 por cientu.
  
La memoria que recueye estos datos presentaos güei pola SGAE van presentase na Asamblea Xeneral de la entidá en Madrid pa la so aprobación polos socios. Una vez superáu esti procesu, la información va publicase na páxina web de la Sociedá Xeneral d'Autores "como muestra de tresparencia", según apuntó Vidal.
  
El direutor de la zona noroeste de la entidá acabó la so intervención recordando que la SGAE a nivel estatal sufrió una recesión del 5,1 por cientu nel 2009 frente a la estabilidá de los resultaos n'Asturies. Nesti sen, dixo que "la cultura ye una actividá económica como cualquier otra", y animó a apostar por ella en tiempos de crisis.
 
Preguntáu pol númberu de sanciones que se rexistren n'Asturies por incumplimientu de derechos d'autor, Vidal cifró nun cuatro por cientu del censu de la SGAE los casos ante los que la entidá interpunxo una demanda.
  
Coles mesmes, recordó: "nun ponemos multes, la nuesa ferramienta ye'l diálogu y l'información". Asina asegura que se solucionen el 99 por cientu de los casos, l'ún por cientu restante "requier otres midíes".