El Bloque solidarízase cola senadora colombiana Piedad Córdoba

El Bloque refuga les acusaciones formulaes pola Procuraduría Xeneral de Colombia contra Piedad Córdoba, que según el partíu quieren “entorpecer y paralizar les acciones de paz”.

La Procuradoría Xeneral de Colombia acusó a la senadora Piedad Córdoba d'apoloxía y tener venceyos cola organización FARC (Fuerces Armaes Revolucionaries de Colombia), más allá de lo razonable y lo necesario nes xestiones realizaes na mediación con esti grupu armáu pa la lliberación de dellos militares reteníos.

Pal Bloque por Asturies, estes acusaciones tienen la intención de paralizar y entorpecer les acciones de les organizaciones d'activistes pola paz en Colombia y enmárquense nun plan primeramente diseñáu pol DAS (Departamentu Alministrativu de Seguridá) de Colombia, qu'inclúi too tipu de presiones, estorsiones y amenaces.

Nesti sentíu, el Bloque nun tien dulda dalguna de la relación ente esta acusación contra Piedad Córdoba y l'escándalu de les llamaes “chuzadas” del DAS a maxistraos, periodistes y políticos de la oposición colombiana.

El Bloque considera que les acusaciones son dafechu infundaes y absurdes, “yá que la Procuraduría llogra les pruebes n'informaciones conteníes en computadores y l'accesu a los datos nun s'acoyó a los principios reconocíos internacionalmente pal tratamientu de pruebes electróniques per parte de los organismos encargaos de l'aplicación de la llei”.

El Bloque por Asturies sofita decididamente la llucha de la senadora y de la organización colombiana pola paz, l'Alcuerdu Humanitariu y la salida axustada al conflictu políticu, social y armáu que vive Colombia. Amás, esixe enérxicamente que se retiren, de manera inmediata, les  acusaciones de pa Procuraduría Xeneral de Colombia, “n'ares de la paz, la xusticia y el diálogu”.

La senadora Piedad Córdoba acaba de rematar la primer parte de la Xira Europea pola Paz en Colombia y l'Alcuerdu Humanitariu, que cuntó con enormes sofitos internacionales, ente ellos el del Gobiernu d'Asturies.