UNA y PAS denuncien la “xestión nefasta” de la Campa Torres.

UNA y PAS denuncia “un nuevu despreciu” del Principáu a la cultura asturiana, “que se manifiesta col afayu de 20.000 pieces abandonaes de la de la Campa Torres”.

La vocera d'UNA-Xixón, Yolanda González afirma que los fechos denunciaos públicamente nos últimos díes, en cuantes qu'afeuten a un bien declaráu d'interés cultural, pudieren ser constitutivos d'una infracción, “inclusive bien grave”, de la Llei 1/2001 de 6 de marzu de Padremuñu Cultural y anuncia que la denuncia efectúase nel marcu de l'aición pública que la mesma llei establez.

Yolanda González, considera inalmitible que la nueva responsable de la escavación de la Campa Torres nun se plantegue siquiera onde s'atopa'l trabayu de les escavaciones efectuáu con anterioridá a la so llegada al puestu y considera que "en conciencia, nuna actuación tan llamentable como ésta nun valen escuses nin de los nuevos nin de los anteriores responsables que van tener qu'encarar les sos respectives responsabilidaes”

La vocera d'UNA en Xixón plantegó igualmente la necesidá de que los responsables políticos del Conceyu y de la Conseyería, “actúen con contundencia nel exerciciu de les sos funciones asumiendo les obligaciones que-yos correspuenden como alministraciones públiques”.  

“Ye necesario dar esplicaciones de por qué un padremuñu que ye una gran bayura cultural y que pue ser un dinamizador económicu tratóse d'esta manera y que, per una vegada, se depuren responsabilidaes polítiques por esta xestión nefasta, qu'en cualesquier otru llugar del mundu onde se respete'l padremuñu supondría dimisiones o ceses fulminantes”, señala pa finar.

El PAS tamién denuncia “l'escandalosu espoliu”

Pal Partíu Asturianista, que venti mil pieces permanecieren mientres una década en paraderu desconocíu, ensin catalogar y ensin protexer nun pue calificase más que como “un espoliu, pues el so valor arqueolóxicu perdiese”.

La organización diz que la cuestión va aportar en muncho más grave entá si se confirma que dalgunes varies o munches pieces perdiéronse y que dalgunes se topen en manes de particulares, “y amás, fuera de Asturies, en Cataluña”.
 
“Al marxe de la responsabilidá personal de los arqueólogos, nesti sucesu hai graves responsabilidaes institucionales: les del Conceyu de Xixón y les del Gobiernu Asturianu, amás de les que correspuendan a les instituciones rexonales y estatales qu'han de velar pol patrimonio”, apunten dende la formación.

Pal PAS, “nesa vergonzosa y escandalosa desidia” tien muncho que ver la inquina y despreciu que'l PSOE tien a tolo asturiano, “despreciu y inquina que se manifiesta en munchos otros casos, como nel tratu que'l PSOE vien dando al Arte Asturiano”.

“Una vegada más, el PSOE amuesa que tolo que lu importa de Asturies ye aprovechase del poder p'asitiar a los suyos, a tuertu o a derechu, y ensin respetu nengunu por Asturies, pola so cultura o polos asturianos”, señalen dende la formación, que recuerda casos como’l del Muséu Etnográficu de Grandas de Salime.