Día del Llibru Asturianu

Netanyahu propón un Estáu palestín con fronteres provisionales

|

El primer ministru israelín propunxo un acuerdu interín sobre Cixordania qu'incluya la creación d'un Estáu palestín con fronteres provisionales, según informa'l diariu israelí 'Haaretz'.

Netanyahu lo dixo coincidiendo cola reunión que va celebrar esti vienres col unviáu especial d'Estaos Xuníos pa Oriente Próximu, George Mitchell. Netanyahu consideró qu'esta midida desbloquiaría'l procesu de paz, que se caltién enzancáu porque l'Autoridá Palestina niégase a participar nes negociaciones hasta que nun se ponga fin a los programes d'asentamientos israelinos. El primer ministru israelín niégase a parar la construcción de viviendes xudíes nel distritu de Xerusalén Este y calca en retrasar el debate sobre l'estatutu de la capital pal final de les negociaciones.
 
Esti vienres, el primer ministru israelín va reunise col unviáu especial d'Estaos Xuníos pa Oriente Próximu, que ta de visita en Xerusalén, pa siguir coles negociaciones que yá empezaron antes col asesor del Conseyu de Seguridá Nacional d'Estaos Xuníos, Dan Shapiro.
 
Mitchell va axuntase tamién a primer hora col ministru de Defensa israelín, Ehud Barak, y va llegar a Ramala a última hora de la tarde pa reunise col presidente de l'Autoridá Palestina, Mahmud Abbas.
 
Netanyahu y los sos ayudantes tuvieron en contactu con representantes del Gobiernu d'Estaos Xuníos pa poner fin a la crisis que se produxo ente ambos países dende que'l Gobiernu israelí anunciare que caltendría la so política d'asentamientos mientres la visita del vicepresidente d'Estaos Uníos, Joe Biden. Washington considerólu un xestu provocador y contrariu a la continuación de les conversaciones de paz na zona.
 
Les declaraciones públiques d'altos cargos d'Estaos Uníos y d'Israel planteguen que les fórmules pa poner fin a la crisis ente ambos gobiernos inclúin, ente otros propuestes, la creación d'un Estáu palestín temporal dientro de fronteres tamién temporales, el retrasu del debate sobre Xerusalén y midíes pa evitar provocaciones per parte del Gobiernu israelí, indicó'l diariu israelí.

 

Contador Estadistiques