El 80% de la vivienda construyida n'Asturies nel 2009 foi de protección

El direutor xeneral de Vivienda, Manuel González Orviz, aseguró que'l 80% de les viviendes que se construyeron n'Asturies mientres l'añu pasáu teníen algún tipu de protección.

Orviz realizó estes declaraciones esta mañana n'Avilés, a donde acudió pa firmar los contratos de los primeros pisos que se van construyir nel urbanizable de La Madalena. Orviz esplicó que nel 2009 empezáronse "más de 3.200 viviendes, de les que namás 800 son llibres". "Esto fixo qu'esti añu siguieren baxando los precios", indicó. "N'Asturies fiximos un esfuerzu bien importante pa xenerar suelu pa vivienda protexida, lo que favoreció la competencia de precios de vivienda protexida, porque naide va mercar viviendes si al llau tienles más barates y con casi les mesmes calidaes".
 
Aprovechando la so visita a Avilés esplicó que Soxepsa, que promovió l'urbanizable de La Madalena, yá vendió suelu a promotores pa construyir un terciu de les viviendes que se van facer ellí. Amás, la conseyería recibió más de 200 solicitúes pa qu'otros tantos pisos seyan protexíos, de los que yá se dieron calificaciones a 157.
 
Orviz esplicó que'l preciu de les viviendes ronda los "100.000 o 120.000 euros, más IVA, con garaxe y trasteru". Polo que se refier al perfil del que merca estos pisos indicó que son "xeneralmente pareyes, que puen tener o non formalizada la relación, y que ganen menos de 4,5 veces l'Iprem, perbaxo de los 40.000 euros".