'Memoria y República' va apelar l'archivu de la güesa de Llaranes

La Federación Asturiana Memoria y República va apelar énte l'Audiencia, l’archivu de la denuncia que presentaron relativa a la güesa de Llaranes (Avilés).

El Xulgáu d’Instrucción númberu ún d’Avilés archivó la denuncia de ‘Memoria y República’ sobre la güesa al nun considerar el tema como penal, sinón alministrativu.

FAMYR considera qu'énte les evidencies de la esistencia de la señalada güesa, el Xulgáu nunca tuvo d'archivar l'asuntu, “sinón que tuvo de siguir coles investigaciones sobre les circunstancies de la mesma, tomar les midíes de protección afeches pa llograr la so non destrucción y profanación, y alcordar la exhumación de los cadabres, según los protocolos llegales vixentes, como de normal faise, independientemente de que les muertes tengan causa n'asesinatos del Franquismu o non”. Amás, FAMY recurre a l'Audiencia Provincial, nuevos datos llograos nes últimes selmanes.

L’asociación tamién pidió aconceyase col Fiscal Superior d'Asturies, Gerardo Herrero, col enfotu de pidi-y qu'exercite, d'oficiu, les acciones que-y correspuenden, como protector de la llegalidá, n'ares de que se tomen midíes efectives qu'eviten, per un sitiu, la destrucción y profanación de dicha güesa, y por otru, qu'encamiente a les autoridaes xudiciales que sían elles les que tomen nes sos manos la investigación.    

FAMYR considera que nun basta con dicir que nun se debe procesar al Xuez Garzón, como dicen ciertos sectores xudiciales y la mesma Fiscalía, “sinón que faen falta midíes oportunes por que la llínea abierta por Garzón, d'investigación de los crimes del Franquismu, concrétese en midíes efectives nos xulgaos d'instrucción y audiencies provinciales, pos lo contrario nun ye más qu'una mera pose o una hipócrita rasgadura de vestidures, de claru matiz partidista ya interesáu”.