Nicolas Bartolomé Pérez nuevu académicu correspondiente

L’Academia de la Llingua Asturiana va celebrar el próximu 7 de mayu, el XXXI Día de les Lletres con una Xunta Estraordinaria nel Teatru Campoamor, onde van nomar al lleonés Nicolas Bartolomé Pérez nuevu académicu correspondiente.

La Xunta Estraordinaria de l’Academia de la Llingua va entamar a les 20.30 hores (la manifestación de la Xunta pola Defensa de la Llingua sedrá una hora enantes). Abrirá l’actu un entamu músical de la mano del cantante de tonada Ché de Cabaños, acompañáu a la gaita por Rodrigo Joglar.

Darréu, vendrá’l nomamientu de Nicolás Bartolomé Pérez como nuevu académicu correspondiente. Ésti abogáu lleonés residente n’Asturies ye un estudiosu de la cultura tradicional de la so tierra de ñacencia, tien publicaos colaboraciones en “Lletres Asturianes” o “Asturies, memoria encesa d’un país”. En 2007 espublizó “Filandón, lliteratura popular llionesa”, una antoloxía onde recueye lla lliteratura oral del sur del Cordal. Anguaño participa nel conseyu de redacción de la revista zamorana “Faceira”. El so últimu trabayu ye una propuesta de terminoloxía xurídica al traviés del Termast.

Con esti nomamientu l’Academia refuerza la presencia de miembros lleoneses dientro de la institución, esistente dende un entamu na figura de Roberto González-Quevedo, anguaño secretariu de l’ALLA.

Depués de l’acoyida del nuevu académicu, vendrá’l discursu añal de la presidenta de l’ALLA, Ana Mª Cano, onde la institución valorará la situación de la llingua y la cultura asturiana nel últimu ciclu.

Una esbilla de poemes del últimu ‘Lletre Lliterariu’ y la música d’Alfredo González pondrán-y pieslle a la xornada más importante pa les lletres del país.
 
Nicolas Bartolomé Pérez; "Dalgunos en Lleón tán inventando un modelu político-llingüísticu pa castellanofalantes"
 
Pa Nicolás Bartolomé la Junta entiende que yá fizo abondo mentando la llingua nel Estatutu castellano-lleonés