Los checos nun quieren romaní nes escueles

La propuesta de les autoridaes cheques d'ufiertar clases de romaní, l'idioma de la minoría xitana, provocó una campaña en Facebook contraria a esti plan.

Más de 85.000 persones yá s’axuntaron a una de les páxines de la rede social en contra de la enseñanza de romaní nes escueles cheques, a pesar que la propuesta del Gobiernu checu yera de caracter voluntariu y col consentimientu de los padres.

El Ministeriu d'Educación y los activistes xitanos  sosprendiéronse énte la rapidez y la fuercia del refugu nacional contra esta iniciativa. Un voceru del ministeriu, Tomes Bouska, realizó unes declaraciones na radio checa nes qu'afirmaba que la campaña de Facebook yera una prueba de la necesidá de mayor educación multicultural nes escueles.

Dende les asociaciones xitanes cheques, recuerden que les autoridaes siguen unviando a los neños xitanos a escueles p'alumnos con problemes mentales, ufiertándo-yos, poro, una educación inferior, según un informe recién d'Amnistía Internacional. La práctica contradiz una llei del Tribunal Européu de Derechos Humanos de 2007, que declaró que la República Checa discriminaba a los neños xitanos unviándolos a escueles especiales.

“El problema real ye asegurar una educación de calidá en checu pa los neños xitanos y que estos puedan aprender, a comuña, colos sos compañeros checos”, afirmó Rob Kushen, director del European Roma Rights Centre.

El romaní ye la llingua propia del pueblu xitanu. Ye una llingua indoeuropea, orixinaria de la zona noroeste de l'antigua India y el centru de Paquistán, arriquecida con pallabres emprestaes de les llingües que se falaben nos países polos que los xitanos foron pasando. Calcúlase que tien más de 1.000 años d'esistencia y anguaño ye falada n'Europa, oeste d'Asia, norte d'África y  América.

Dellos Estaos pertenecientes al Conseyu d'Europa (organismu qu'axunta a tolos Estaos d'Europa, sacantes Bielorrusia por falta de garantíes democrátiques y Kosovu por ser recién la so independencia y nun tar reconocíu por toos) roblaron el tratáu internacional Carta Europea de les Llingües Minoritaries o Rexonales comprometiéndose a protexer esta llingua.

Nesti tratáu cada Estáu escueye los idiomes a protexer y en qué midida. Los que falen de protexer eromaní son; Alemaña, Austria, Eslovaquia, Eslovenia, Finlandia, Montenegro, Países Baxos, Rumania, Serbia y Suecia. Queda ensin protexer la llingua en comunidaes de; Albania, Bosnia-Herzegovina, Bulgaria, Croacia, República Checa, España, Estonia, Francia, Grecia, Hungría, Italia, Letonia, Lituania, Macedonia, Moldavia, Noruega, Polonia, Portugal, Reinu Xuníu, Rusia, Suiza, Turquía y Ucrania.